Hoppa yfir valmynd
2. janúar 2020

134 fyrirtæki og stofnanir komin með jafnlaunavottun

Fyrir áramótin höfðu 134 fyrirtæki og stofnanir öðlast jafnlaunavottun. Hjá þessum aðilum starfa sextíu þúsund starfsmenn. Samkvæmt upplýsingum frá Hagstofu Íslands eru að jafnaði um tvö hundruð þúsund starfandi á landinu á hverjum tíma. Við setningu laga nr. 56/2017 um jafnlaunavottun var áætlað að lögin myndu ná til um 1.200 fyrirtækja, alls u.þ.b. 147 þúsund starfsmanna eða um 80% launafólks á landinu. Samkvæmt ofangreindum tölum nær jafnlaunavottun nú þegar til 40% þeirra starfsmanna sem lögin taka til. Alls áttu 269 fyrirtæki og stofnanir að vera komin með jafnlaunavottun um þessi áramót.

Lög um jafnlaunavottun tóku gildi 1. janúar 2018 og ná til fyrirtækja og stofnana með fleiri en 25 starfsmenn að jafnaði á ársgrundvelli. Framkvæmd laganna var skipt í áfanga og skyldu stærstu fyrirtæki landsins með fleiri en 250 starfsmenn öðlast jafnlaunavottun fyrir 31. desember 2019. Sami tímafrestur var settur fyrir opinbera aðila sem eru meira en að hálfu í eigu ríkisins og þar sem 25 eða fleiri starfsmenn starfa á ársgrundvelli.

Síðasti áfanginn verður við árslok 2022, þegar öll fyrirtæki með fleiri en 25 starfsmenn skulu hafa öðlast jafnlaunavottun.

Lista yfir fyrirtæki og stofnanir sem hafa öðlast jafnlaunavottun má finna á vef Jafnréttisstofu.

Heimsmarkmiðin

 Jafnrétti kynjanna

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira