Hoppa yfir valmynd
29. janúar 2020 Fjármála- og efnahagsráðuneytið

Margir nýta skattaafslátt vegna erlendra sérfræðinga

Fjöldi fyrirtækja og stofnana nýtti sér á síðasta ári heimild til þess að sækja um frádrátt frá tekjuskatti fyrir erlenda sérfræðinga sem ráðnir eru til starfa hér á landi vegna sérþekkingar og reynslu. Nefnd sem tekur á móti umsóknum um frádráttinn fékk 113 slíkar umsóknir í fyrra og afgreiddi 111 þeirra. 87 umsóknir voru samþykktar, eða 77%.

Langflestar umsóknirnar komu frá fyrirtækjum, eða alls 75 og voru 72% þeirra samþykktar. Frá háskólum komu 29 umsóknir og voru allar samþykktar, en ein er enn í vinnslu.  9 umsóknir komu frá stofnunum ríkis eða sveitarfélaga, sjúkrahúsum eða sjálfseignarstofnunum og var rúmlega helmingur þeirra samþykktur.

Karlar eru í meirihluta umsækjenda, eða 60% en meðalaldur allra umsækjenda er 34 ár. Karlar eru á bak við um 65% samþykktra umsókna en konur 35%. Af þeim sem sóttu um eru 40% með doktorspróf, 36% með masterspróf og 17% með bakkalárpróf, en um helmingur samþykktra umsókna er vegna umsækjenda sem lokið hafa doktorsprófi.

Umsækjendur eru frá 34 löndum. Þar af er 21 umsækjandi frá Íslandi, en þar um að ræða einstaklinga sem dvalist hafa erlendis við nám eða störf og komið til Íslands til starfa að því loknu. Þá eru fjórtán frá Indlandi og tólf frá Bandaríkjunum en færri sérfræðingar frá öðrum ríkjum.

Með lögum nr. 79/2016 var lögfest breyting á ýmsum lögum til að styðja við fjármögnun og rekstur nýsköpunarfyrirtækja, þar á meðal frádráttarheimildir fyrir erlenda sérfræðinga sem ráðnir eru til starfa hér á landi vegna sérþekkingar sinnar og reynslu. Reglugerð sem byggist á ofangreindum lögum um frádrátt frá tekjum erlendra sérfræðinga var gefin út í lok árs 2016. Heimildin felur í sér að þeir sem uppfylla ákveðin skilyrði geta nýtt heimild í tekjuskattslögunum um að einungis 75% tekna þeirra séu tekjuskattsskyldar, bæði í staðgreiðslu og við endanlega álagningu, fyrstu þrjú árin í starfi.


Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira