Hoppa yfir valmynd
14. ágúst 2020 Utanríkisráðuneytið

Utanríkisráðherrafundur NB8-ríkja um Hvíta-Rússland

Guðlaugur Þór Þórðarson, utanríkis- og þróunarsamvinnuráðherra, á fundi NB8-ríkjanna í dag - myndUtanríkisráðuneytið

Ástandið í Hvíta-Rússlandi var til umræðu á sérstökum utanríkisráðherrafundi Norðurlanda og Eystrasaltsríkja sem haldinn var í dag. Samstaða var um að senda yrði stjórnvöldum í Minsk skýr skilaboð um að framganga þeirra í tengslum við forsetakosningarnar þar í landi yrði ekki látin óátalin. 

Fulltrúar ríkjanna átta sem tóku þátt í fjarfundinum í dag voru sammála um að styðja þyrfti við bak þeirra borgara Hvíta-Rússlands sem mótmælt hafa með friðsömum hætti framkvæmd forsetakosninganna um síðustu helgi. Ofbeldi sem stjórnvöld hafa beitt verði að linna, láta skuli mótmælendur lausa úr haldi og viðræður við stjórnarandstöðuna teknar upp án tafar. 

Guðlaugur Þór Þórðarson, utanríkis- og þróunarsamvinnuráðherra, lýsti á fundinum yfir ánægju með samstöðuna sem náðst hefði um málið eins og sameiginleg yfirlýsing utanríkisráðherra NB8-ríkjanna frá í fyrradag sýndi. „Það er mikilvægt að við tölum einni röddu í þessu máli enda snýst það um grundvallarmannréttindi. Það er með ólíkindum að slík kúgun og valdníðsla viðgangist í Evrópu nú á dögum enda vorum við á einu máli um að framgöngu ríkisstjórnar Lúkasjenkó forseta væri ekki hægt að láta óátalda,“ sagði Guðlaugur Þór eftir fundinn. 

Á fundinum kom fram vilji til að taka málefni Hvíta-Rússlands upp á vettvangi alþjóðastofnana, til dæmis Sameinuðu þjóðanna, Evrópuráðinu eða Öryggis- og samvinnustofnun Evrópu (ÖSE). Utanríkisráðherrar Evrópusambandsríkjanna ræða málið á fundi sínum síðar í dag.

Auk Guðlaugs Þór Þórðarsonar sátu fundinn Pekka Haavisto, utanríkisráðherra Finnlands, Audun Halvorsen, aðstoðarutanríkisráðherra Noregs, Robert Rydberg, aðstoðarutanríkisráðherra Svíþjóðar, Jesper Møller Sørensen, skrifstofustjóri alþjóðamála í danska utanríkisráðuneytinu, Ilgvars Klava, skrifstofustjóri tvíhliða samskipta í utanríkisráðuneyti Lettlands, Linas Linkevicius, utanríkisráðherra Litháens og Urmas Reinsalu, utanríkisráðherra Eistlands, sem var fundarstjóri, en Eistland gegnir nú formennsku í samstarfi Norðurlandanna og Eystrasaltsríkjanna.

 
  • Frá utanríkisráðherrafundi NB-ríkjanna um Hvíta-Rússland

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira