Hoppa yfir valmynd
13. október 2020 Mennta- og menningarmálaráðuneytið

Evrópsku kvikmyndaverðlaunin í Hörpu árið 2022​

Verðlaunahátíð Evrópsku kvikmyndaverðlaunanna fer fram í Reykjavík 2022 en ekki í desember í ár eins og til stóð, vegna versnandi ástands heimsfaraldursins COVID-19 í Evrópu. Um er að ræða viðamikið samstarfsverkefni ríkis og borgar við Evrópsku kvikmyndaakademíuna (EFA) í Berlín en að því koma meðal annars Harpa og RÚV. Stafrænni athöfn verður streymt og sjónvarpað beint frá Berlín 12. desember 2020.


Lilja Alfreðsdóttir mennta- og menningarmálaráðherra:

„Við munum halda glæsilega og fjölbreytta hátíðardagskrá til heiðurs evrópskum kvikmyndum, hún verður bara ekki í ár – enda eru nú óvenjulegir tímar sem kalla á sveigjanleika. Þetta er geysilega spennandi tækifæri fyrir íslenska kvikmyndamenningu og kvikmyndageirann hér á landi og við munum nýta það vel.“

Dagur B. Eggertsson borgarstjóri: 
Við vorum farin að hlakka til að taka á móti erlendum gestum okkar í ár og sýna þeim allt það sem við höfum fram á að færa. En þetta er besti kosturinn í stöðunni í ljósi heimsfaraldursins. Það er ánægjulegt að samkomulag hafi náðst um að Evrópsku kvikmyndaverðlaunin verði haldin í Reykjavík að tveimur árum liðnum. Þá getum við einbeitt okkur alfarið að því að undirbúa glæsilega hátíð og hliðarviðburði sem við getum nýtt í markaðssetningu á menningarborginni Reykjavík en ekki síður í þágu íslenskrar kvikmyndagerðar og skapandi greina almennt."

Mike Downey formaður EFA: 
„Þessi ákvörðun var þungbær en hún var tekin af ábyrgð og umhyggju fyrir gestum okkar. Við hjá EFA ásamt vinum okkar á Íslandi erum vonsvikin yfir því að ná ekki hittast í Reykjavík á þessu ári. Mikilli sköpunargáfu, ástríðu og orku hefur verið varið úr öllum áttum við skipulagningu verðlaunakvöldsins og kröftugt teymi unnið að því hörðum höndum. Góðu fréttirnar eru hins vegar þær að öllu þessu er hægt að viðhalda og samstarf okkar mun halda áfram með það að markmiði að halda enn skemmtilegri hátíð til heiðurs evrópskrar kvikmyndagerðar á Íslandi í desember árið 2022, þegar heimurinn verður vonandi búinn að sigrast á COVID-19. Við gleðjumst einnig yfir því að EFA-skógurinn í Heiðmörk, sem við gróðursettum í júlí ásamt Skógræktarfélagi Reykjavíkur og vinum okkar úr íslenska kvikmyndasamfélaginu, heldur áfram að vaxa. Trén 3.750 munu nú dafna í enn hreinna lofti og bíða endurkomu okkar eftir tvö ár.”


Evrópska kvikmyndaakademían vinnur nú nánar að útfærslu rafrænnar evrópskrar kvikmyndahátíðarviku í Berlín í ár samhliða verðlaunaafhendingarkvöldinu en rúmlega 3.800 meðlimir
Evrópsku kvikmyndaakademíunnar munu áður greiða atkvæði um verðlaunin eins og endranær. Vegna heimsfaraldursins verða tilnefningarnar kynntar rafrænt þriðjudaginn 10. nóvember nk. í streymi.

Tvær kvik­mynd­ir þar sem Íslend­ing­ar koma að fram­leiðslunni á eru meðal þeirra 32 kvik­mynda sem eru í fyrra for­vali til Evr­ópsku kvik­mynda­verðlaun­anna í ár. Kvikmynd Rún­ars Rún­ars­son­ar, Berg­mál og Between Heaven and Earth sem Eggert Ket­ils­son, Elísa­bet Rón­alds­dótt­ir og Fahad Falur Jabali fram­leiddu ásamt fleir­um.

 

 

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira