Hoppa yfir valmynd
23. nóvember 2020 Fjármála- og efnahagsráðuneytið

Nýsköpunardagur hins opinbera: Áhrif Covid-19 á þjónustu – hvað má læra til framtíðar?

Hvað getum við lært af Covid-19 þegar kemur að því að veita opinbera þjónustu og hvaða tækifæri hefur heimsfaraldurinn skapað til þess að bæta þjónustuna? Þetta er meginumræðuefni á Nýsköpunardegi hins opinbera sem haldinn verður 21. janúar 2021 en yfirskift dagsins er Áhrif Covid-19 á opinbera þjónustu – lærdómar til framtíðar. 

Heimfaraldurinn hefur haft gríðarleg áhrif á allt samfélagið, þar með talið vinnulag opinberra starfsmanna. Meðal jákvæðra breytinga sem orðið hafa á undanförnum mánuðum er að lagt hefur verið kapp á að hraða breytingum til þess að efla stafræna opinbera þjónustu. Samvinna hefur aukist milli ólíkra stofnana og breytingar hafa orðið í mannauðsmálum. Á Nýsköpunardeginum munu þátttakendur deila reynslusögum um þessi mál og þá verða þrjú fræðsluerindi haldin.

Viðburðurinn er ætlaður öllum þeim sem hafa áhuga á opinberri þjónustu og nýsköpun. Nýsköpunardagur hins opinbera er nú haldinn í annað sinn en að deginum standa fjármála- og efnahagsráðuneytið, Samband íslenskra sveitarfélaga, Ísland.is og kjara- og mannauðssýsla ríkisins. Hægt verður að skrá sig til þátttöku á viðburðinn innan tíðar á Facebook-síðu hans. 

Aðstandendur Nýsköpunardagsins hvetja opinbera vinnustaði til þess að nýta seinni hluta dagsins til að standa að dagskrá þar sem nýsköpun er í aðalhlutverki. Hægt er að halda vinnustofur um innra nýsköpunar- og umbótastarf og greina aukin tækifæri til samvinnu. Hvatt er til þess að spurt verði hvaða breytingar Covid-19 hafi haft á starfsemina sem áhugi er á að viðhalda og hvernig starfsemi og þjónusta þróist með sem bestum hætti næstu árin og hvar helstu tækifæri liggja.


Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira