Hoppa yfir valmynd
3. febrúar 2021 Fjármála- og efnahagsráðuneytið

Fimm milljarðar greiddir í tekjufallsstyrki

Undanfarnar þrjár vikur hafa um fimm milljarðar verið greiddir í tekjufallsstyrki til 822 rekstraraðila. Þessir styrkir leggjast við tugmilljarða stuðning í gegnum fjölþætt úrræði ríkisstjórnarinnar árið 2021.

Tekjufallsstyrkir nýtast fjölmörgum rekstraraðilum sem hafa orðið fyrir verulegu tekjufalli vegna faraldursins og er markmiðið að styðja þau fyrirtæki og einyrkja þar sem tekjufall er meira en 40%.

Skatturinn hefur alls afgreitt um 4.000 umsóknir vegna styrkja sem stofnunin hefur á sinni könnu, sem eru tekjufalls- og lokunarstyrkir og stuðningur við fyrirtæki við greiðslu launa á uppsagnarfresti. Skatturinn hefur lokið við að greiða út styrki fyrir 73% umsókna um tekjufallsstyrki en alls hafa um 94% fullbúinna umsókna sem borist hafa Skattinum verið afgreiddar.

Rétt fyrir jól samþykkti Alþingi lög um viðspyrnustyrki, sem ætlað er að koma til móts við vanda rekstraraðila og búa samfélagið undir það þegar heimurinn opnast að nýju. Undirbúningur umsóknanna er flókinn, tímafrekur og leggst við önnur umfangsmikil verkefni Skattsins á þessum árstíma. Samkvæmt upplýsingum frá Skattinum er aftur á móti allt kapp lagt á að hægt verði að hefja móttöku umsókna um viðspyrnustyrki í lok mánaðarins.

Fjöldi úrræða sem nýtist tugþúsundum

Síðustu mánuði hafa á fjórða þúsund rekstraraðilar og tugþúsundir einstaklinga nýtt sér ýmis úrræði stjórnvalda sem eru á annan tug talsins – styrki, lán, gjaldfresti og annan stuðning. Nefna má að búið er að afgreiða allar umsóknir sem borist hafa um greiðslu hluta launakostnaðar á uppsagnarfresti, alls 1.521 talsins og greiddir hafa verið út styrkir fyrir 12 milljarða króna til rekstraraðila.

Efnahagsaðgerðir Heildarumfang (ma.kr.) Meðalfjárhæð (millj.kr.) Fjöldi(einstaklinga/samþykktra umsókna) 
Hlutabætur 24,5 0,66 37.017
Greiðsla launa á uppsagnarfresti 12,1 8,0 1.521
Lokunarstyrkir 1,9 1,3 1.485
Tekjufallsstyrkir 5,1 6,2 822
Stuðningslán 8,5 9,8 871
 

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira