Hoppa yfir valmynd
24. nóvember 2021 Utanríkisráðuneytið

Guðlaugur Þór stýrði fundi með EFTA-nefndum

Guðlaugur Þór stýrði fundi með þingmannanefnd og ráðgjafarnefnd EFTA. - myndEFTA
Guðlaugur Þór Þórðarson, utanríkis- og þróunarsamvinnuráðherra, stýrði í gær fundi EFTA-ríkjanna með þingmannanefnd og ráðgjafarnefnd EFTA sem fram fór í Brussel. Ráðherrann tók þátt í fundinum með fjarfundarbúnaði og fór í máli sínu yfir áhersluatriði sögulegrar formennsku Íslands í EFTA-samstarfinu en um er að ræða fyrsta skiptið þar sem tímabil formennskuríkis er eitt ár.

„Við höfum sett saman metnaðarfulla framkvæmdaáætlun fyrir komandi formennskuár. EFTA mun áfram verða lykilvettvangur þegar kemur að viðskiptastefnu EFTA-ríkjanna fjögurra og hyggjumst við áfram byggja á þeim grunni,“ sagði ráðherrann.

Ráðherra ítrekaði auk þess mikilvægi öflugrar fríverslunar og opinna viðskipta og kom þeirri brýningu áleiðis að allir hlutaðeigandi sinntu hlutverki sínu við að tryggja gagnsæi og aukinn skilning almennings á fríverslun og þeim ábata sem af henni leiðir.

„Samtalið við þingmenn og aðila vinnumarkaðarins um fríverslunarsamstarfið er mikilvægur þáttur í starfi EFTA og hluti af því að skapa breiða sátt um fríverslun og kynna mikilvægi hennar fyrir EFTA-ríkin,“ sagði Guðlaugur Þór.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira