Ný skýrsla kjaratölfræðinefndar er komin út

Vorskýrsla Kjaratölfræðinefndar 2022 er komin út. Í skýrslunni er fjallað um þróun efnahagsmála og launa á yfirstandandi kjarasamningstímabili.

Meðal helstu niðurstaðna skýrslunnar eru að:

• Hagvöxtur var um 4% á samningstímabilinu en gert var ráð fyrir 10% vexti í upphafi þess. Hagvöxtur á hvern íbúa var neikvæður um 4%.
• Fjárhagsstaða heimilanna er óvenju sterk og tekjur háar í alþjóðlegum samanburði.
• Áhrif stríðsins í Úkraínu á innlenda efnahagsþróun virðast tiltölulega lítil miðað við aðrar þjóðir, að minnsta kosti til skamms tíma.
• Alls voru gerðir 326 kjarasamningar í samningalotunni, þ.a. 189 í einkageiranum og 137 í opinberageiranum.
• Grunntímakaup hækkaði um tæp 23% á vinnumarkaðnum frá upphafi samningstímabilsins í apríl 2019 til janúar 2022. Hækkunin nemur rúmum 21% á almenna markaðnum og tæp 30% hjá Reykjavíkurborg. Hluta hækkunarinnar má rekja til styttingar vinnuvikunnar eða á bilinu 1,3%-4,1%.
• Heildarlaun fullvinnandi á árinu 2021 voru að meðaltali 823 þús. kr. á mánuði.Í samanburði milli markaða voru heildarlaun fullvinnandi á almennum markaði að meðaltali 808 þúsund kr. á mánuði, 903 þúsund kr. hjá ríkinu, 688 þúsund hjá Reykjavíkurborg og 681 þús. kr. hjá sveitarfélögum utan Reykjavíkur.
• Laun kvenna hafa í flestum tilfellum hækkað meira en karla á samningstímabilinu. Á vinnumarkaðnum í heild eru fullvinnandi konur með um 86% af heildarlaunum fullvinnandi karla. Munurinn er minnstur hjá Reykjavíkurborg þar sem fullvinnandi konur eru með tæp 95% af heildarlaunum fullvinnandi karla en 86-89% á öðrum mörkuðum.

Kjaratölfræðinefnd sem var komið á fót í kjölfar kjarasamninga árið 2019 er samstarfsvettvangur um gerð og hagnýtingu tölfræðigagna um laun og efnahag. Í nefndinni sitja fulltrúar heildarsamtaka á vinnumarkaði, ríkis og sveitarfélaga, auk fulltrúa forsætisráðuneytis, félags- og vinnumálaráðuneytis og Hagstofu Íslands. Vorskýrslan 2022 er fjórða skýrsla nefndarinnar en hún gefur út tvær skýrslur á ári.

Skýrslan og tölfræðigögn eru aðgengileg á vef Kjaratölfræðinefndar. Það er von nefndarinnar að sá grunnur upplýsinga og tölfræðigagna sem settur er fram í skýrslunni nýtist haghöfum vel við mat á kjaraþróun og við undirbúning komandi kjarasamninga.