Ráðherra ávarpaði málþing lýðræðisafla Belarús

Staða Belarús var umræðuefni á málsþingi sem haldið var á vegum skrifstofu Sviatlönu Tsikhanouskayu í Vilníus í morgun. Þórdis Kolbrún Reykfjörð Gylfadóttir utanríkisráðherra var meðal frummælenda á fundinum ásamt Tsikhanouskayu, João Cravinho utanríkisráðherra Portúgals, Mantas Adomėnas aðstoðarutanríkisráðherra Litáens og Lauri Tierala ráðherraritara í utanríkisráðuneyti Finnlands.

Sífellt nánari tengsl stjórnar Lúkasjenkó við rússnesk stjórnvöld, viðvera rússnesks herafla í Belarús, yfirvofandi flutningur kjarnavopna þangað, og áhrif þessarar þróunar á fullveldi landsins voru til umfjöllunar á málþinginu sem bar yfirskriftina „Fullveldi Belarús og öryggi Evró-Atlantshafssvæðisins.“ 

Í máli sínu lagði Þórdís Kolbrún áherslu á mikilvægi baráttu lýðræðisafla í Belarús fyrir lýðræðisþróun í heiminum. „Barátta þeirra sem berjast fyrir opnu og lýðræðislegu samfélagi snertir okkur öll sem deilum þeirri trú að opin og lýðræðisleg samfélög bjóði upp á bestu lífsgæðin og feli í sér bæði einstaklingsfrelsi og réttæti. Barátta þeirra sem leggja sig sjálf í hættu til þess að vinna slíku samfélagi brautargengi er ákaflega aðdáunarverð og ég lít á það sem mikilvægt forgansmál í utanríkisstefnu okkar Íslendinga,“ segir Þórdís Kolbrún.

Að loknu málþinginu fór fram athöfn þar sem Sviatlana Tsikhanouskaya sæmdi Þórdísi Kolbrúnu heiðursorðu fyrir stuðning hennar og íslenskra stjórnvalda við lýðræðisöfl Belarús.