Fjölmennt málþing Velferðarvaktarinnar um stöðu tekjuminni hópa á húsnæðismarkaði

Velferðarvaktin stóð fyrir fjölmennu málþingi í dag sem bar yfirskriftina Tjaldað til einnar nætur? Þar var fjallað um stöðu tekjuminni hópa á húsnæðismarkaði.

Erfiðleikar á húsnæðismarkaði og einkum aðstæður þeirra sem búa við það óöryggi sem fylgir því að eiga í húsnæðisvanda, hafa lengi verið til umræðu í samfélaginu. Markmiðið með málþinginu var að fá fram raunsæja mynd af stöðunni og ræða hvernig bregðast megi við henni. Málþinginu var streymt – sjá upptöku hér að neðan. 

„Við höfum áhyggjur af húsnæðismarkaðnum á Íslandi í dag. Of hátt húsnæðisverð, allt of há leiga, of mikið af óboðlegu húsnæði og of langir biðlistar, eru verkefni sem þarf að vinna hratt á. Á sama tíma sjáum við mikinn samdrátt í uppbyggingu húsnæðis. Oft var þörf, en nú er nauðsyn. Allir verða að leggjast á eitt til að mæta þessu áskorunum,“ segir Siv Friðleifsdóttir, formaður Velferðarvaktarinnar.

Sigurður Ingi Jóhannsson, innviðaráðherra, og Heiða Björg Hilmisdóttir, formaður Sambands íslenskra sveitarfélaga, héldu erindi á málþinginu þar sem upplýst var um stöðu og eftirfylgni rammasamnings um húsnæðisuppbyggingu sem undirritaður var í júlí 2022.

• Glærur Sigurðar Inga Jóhannssonar 
• Glærur Heiðu Bjargar Hilmisdóttur

Lífið á leigumarkaði 

Guðmundur Hrafn Arngrímsson, formaður Samtaka leigjenda á Íslandi, fjallaði um stöðuna á leigumarkaði og kynnti einnig niðurstöður könnunar á stöðu leigjenda sem framkvæmd var í maí sl. Ragnar Þór Ingólfsson fór yfir stöðuna hjá Bjargi íbúðafélagi, sem ætlað er að tryggja tekjulágum fjölskyldum á vinnumarkaði aðgengi að öruggu og vönduðu íbúðarhúsnæði.

Vilborg Oddsdóttir, félagsráðgjafi og umsjónarmaður innanlandsstarfs Hjálparstarfs kirkjunnar, sagði frá því hvernig staðan á húsnæðismarkaði hefur áhrif á þann hóp sem höllustum fæti stendur og þarf að leita aðstoðar hjálparsamtaka. 

• Glærur Guðmundar Hrafns Arngrímssonar: Lífið á leigumarkaði, óöryggi og okurleiga 
• Glærur Ragnars Þórs Ingólfssonar um Bjarg íbúðafélag 
• Glærur Vilborgar Oddsdóttur: Tjaldað til einnar nætur

Margvísleg erindi og umræður á borðum

Þórólfur Júlían Dagsson, stofnandi hóps heimilislausra Íslendinga, flutti erindi á málþinginu og María Pétursdóttir, formaður húsnæðismálahóps ÖBÍ réttindasamtaka, kynnti nýja skýrslu samtakanna um húsnæðismál fatlaðs fólks. 

Þá voru fluttar nokkrar örsögur en þær sannar sögur fólks sem félagsráðgjafar tóku saman í tilefni Alþjóðadags félagsráðgjafar fyrr á þessu ári og lýsa afar vel þeim veruleika sem tekjulágir hópar búa við á Íslandi í dag.

Að loknum erindum fóru fram umræður á borðum þar sem gestum gafst kostur á að ræða þær upplýsingar sem fram komu í erindum dagsins og ræða hvaða úrbætur væru brýnastar.