Ísland tók þátt í árlegri netvarnaræfingu Atlantshafsbandalagsins
Yfir 1300 netvarnarsérfræðingar sóttu æfinguna og CERT-IS, netöryggissveit íslenskra stjórnvalda, tók þátt fyrir hönd Íslands og stýrði undirbúningi verkefnisins í samstarfi við varnarmálaskrifstofu utanríkisráðuneytisins. Æfingin fór að hluta fram í netöryggissetri Atlantshafsbandalagsins í Tallinn í Eistlandi en netvarnarmiðstöðvar í ríkjunum sjálfum tóku einnig virkan þátt í henni.
Þátttaka Ísland er mikilvægur liður í að styrkja innlendar netvarnir og er hluti af netaðgerðaáætlun stjórnvalda sem var samþykkt á síðasta ári samhliða netöryggisstefnu fyrir Ísland. Æfingar eru lykilþáttur í undirbúningi og þjálfun þeirra aðila sem verja íslenskt netumdæmi þegar til netárása kemur og hafa nú þegar skilað árangri og bættu samstarfi við vina- og bandalagsþjóðir.
Ísland tók þátt í annarri netvarnaræfingu á vegum Atlantshafsbandalagsins í vor en þá bar sameiginlegt lið Íslands og Svíþjóðar sigur úr býtum í æfingunni Skjaldborg (e. Locked Shields).
