Dómsmálaráðherra fundaði með Volker Türk

Þorbjörg Sigríður Gunnlaugsdóttir, dómsmálaráðherra, fundaði í dag með Volker Türk, mannréttindafulltrúa Sameinuðu þjóðanna. Türk er staddur hér á landi í vinnuheimsókn

Á fundinum var farið almennt yfir stöðu mannréttindamála á Íslandi, bakslagið í mannréttindabaráttunni og kynjajafnrétti.

Á fundinum áréttaði ráðherra að Ísland tæki alþjóðlegar skuldbindingar sínar í mannréttindamálum alvarlega, og að íslenskt réttarkerfi væri að mörgu leyti litað af alþjóðlegum skuldbindingum ríkisins á borð við mannréttindasáttmála Evrópu.

Þá minntist ráðherra á að skýrslu Íslands vegna fjórðu allsherjarúttektar mannréttindaráðs Sameinuðu þjóðanna á stöðu mannréttindamála hefði verið skilað í lok síðustu viku. Þegar væri farið að huga að undirbúningi fyrirtöku vegna skýrslunnar, sem fer fram í Genf í janúar.

Türk spurði sérstaklega hvað Ísland væri að gera í tengslum við kvennamorð (e. femicide). Ráðherra vísaði í því samhengi til nýrrar landsáætlunar stjórnvalda gegn kynbundnu ofbeldi fyrir árin 2026-2030, þar sem gert er ráð fyrir að verklag við rannsókn á slíku ofbeldi verði skoðað í samstarfi við ríkislögreglustjóra. Enn fremur vísaði ráðherra til þess að aðgerð stjórnvalda gegn kvennamorði eigi rætur sínar að rekja til tilmæla frá GREVIO.

Ráðherra lagði mikla áherslu á baráttuna gegn kynbundnu ofbeldi og mikilvægt væri að stíga fast til jarðar í þeim efnum.

Fundarmenn voru sammála um að aukinn metnaður og samstaða ríkja væru lykilforsendur fyrir því að halda áfram að tryggja mannréttindi á heimsvísu.