13. nóvember 2026 /
Utanríkisráðuneytið

Föstudagspóstur 13. nóvember 2026

Heil og sæl,

Þorgerður Katrín Gunnarsdóttir, utanríkisráðherra, skrifaði um mikilvægi frjálsra viðskipta og áherslur sínar að greiða aðgang að erlendum mörkuðum í grein sem birt var í Morgunblaðinu þann 5. nóvember sl.

 

Nýlega var ráðherra einnig gestur á sameiginlegum fundi sendiherra Evrópusambandsríkja á Íslandi. Á myndinni má sjá ráðherra ásamt sendiherrum Danmerkur, Finnlands, Póllands, Spánar, Svíþjóðar, Þýskalands og Evrópusambandsins.

Berlín

Sendiráðsteymið okkar í Berlín stóð fyrir ráðstefnu í sameiginlegu sendiráðsbyggingu Norðurlandanna í Berlín, Fellashaus, sem bar heitið Meira en bara flak: framtíð 100% fisks eða Beyond the fillet: the future of 100%. Ráðstefnan leiddi saman fulltrúa íslenskra og þýskra stjórnvalda, fulltrúa sjávarútvegs- og nýsköpunarfyrirtækja, rannsakendur og frumkvöðla til þess að ræða saman sjálfbærni, hagkvæmni, aukna verðmætasköpun og tækifæri í sjávarútvegi.

Freetown

Sendiráð Íslands Í Freetown tók þátt í vettvangsferð ásamt Mannfjöldastofnun Sameinuðu þjóðanna og heilbrigðisráðuneytis Síerra Leóne til hérðassjúkrahússins í Makeni til þess að kynna sér árangur þróunarsamvinnuverkefnis íslenskra stjórnvalda í baráttunni gegn fæðingarfistli.

Helsinki

Nína Björk Jónsdóttir, sendiherra, rifjar upp fyrstu kynni sín af Finnlandi og finnskri menningu í myndbandi sem sendiráðið deildi á samfélagsmiðlum sínum.

Kaupmannahöfn

Um 80 ungmenni frá Norðurlöndum komu saman á ráðstefnu í Kaupmannahöfn á vegum norrænu YATA-samtakanna þar sem fjallað var um öryggi á norðurslóðum, norrænt varnarsamstarf og áskoranir sem við blasa á sviði öryggis- og varnarmála. Pétur Ásgeirsson, sendiherra, flutti opnunarávarp ráðstefnnunar sem fór fram í Ráðhúsinu á Frederiksberg.

Sendiherra tók þátt í umræðufundi á vegum finnska sendiráðsins í vikunni ásamt Suzanne Innes-Stubb, forsetafrú Finnlands.

Lilongwe

Í síðasta föstudagspósti var fjallað um opnun nýs fæðingarspítala í Kakanhira í Mangochi-héraði og heimsókn tveggja alþingismanna sem eiga sæti í þróunarsamvinnunefnd. Sendiráðið í Lilongwe deilir nú myndbandi frá opnun spítalans.

Í þessari viku fór sendiráðsteymið okkar í vettvangsferð ásamt sendiráði Noregs og fulltrúum frá Þróunaráætlun Sameinuðu þjóðanna (UNDP) í Mangochi-hérað til þess að kynna sér árangur og framvindu þróunarsamvinnuverkefna þar.

London

Þórdís Kolbrún Reykfjörð Gylfadóttir, sendiherra Íslands í London, stýrði hringborðsumræðum um tengsl öryggis og atvinnulífs á norðurslóðum. Hringborðsumræðan var var haldin í tengslum við ráðstefnu BBA/Fjeldco og Arion banka um fjárfestingar á norðurslóðum.

Nýlega fór fram ein stærsta ráðstefna heims á sviði ferðaþjónustu, ráðstefnan World TRavel Market (WTM) í London. Þórdís Kolbrún, sendiherra, heimsótti íslenska sýningarsvæðið þar sem 29 ferðaþjónustufyrirtæki og markaðsstofur kynntu starfsemi sína og þjónustu.

Madríd

Sendiráð Norðurlanda tóku þátt í dagskrá alþjóðlegu kvikmyndahátíðarinnar Silver Sea í San Luis í vikunni. Norræni viðburðurinn bar heitið Norræn ljós eða Luces Nórdicas þar sem fjallað var um norræna kvikmyndageirann og kvikmyndir.

Kristján Andri Stefánsson, sendiherra Íslands í Madríd, heimsótti Evrópsku hönnunarstofnunina í Madríd þar sem hann kynnti sér starsfemi skólans og framlag hans til menntunar á sviði hönnunar, tísku og annarra skapandi greina. Sendiherra ræddi við forstöðumann stofnunarinnar um möguleg samstarfsverkefni og tækifæri til að styrkja tengsl íslenskra og spænskra skapandi greina.

Nýja-Delí

Benedikt Höskuldsson, sendiherra Íslands á Indlandi, og Rachel John, viðskipta- og upplýsingafulltrúi sendiráðsins, sóttu ráðstefnu Alþjóðlega sólarorkubandalagsins, en Ísland gerðist nýlega aðildarríki að bandalaginu. Markmið bandalagsins er að vekja athygli á og styðja við sjálfbær orkuskipti í heiminum, þá sérstaklega nýtingu endurnýjanlegra orkugjafa líkt og sólarorku.

Sendiráðsteymið okkar mætti svo einnig í fullum skrúða í vinnuna í tilefni Divali hátíðarinnar.

Ottawa

Sendinefnd skipuð fulltrúum norræna skapandi greina sóttu CINARS Biennale ráðstefnuna í Montréal í vikunni. Sendiráðsteymið okkar í Kanada studdi við heimsókn íslenskra fulltrúa á vegum Sviðslistamiðstöðvar Íslands.

Staðgenglar sendiherra úr sendiráðum Norðurlanda í Kanada fóru í sameiginlega vinnuferð til Winnipeg í síðustu viku, en ferðin var styrkt af Norrænu ráðherranefndinni. Í heimsókninni funduðu fulltrúar sendiráðanna með stjórnmálafólki og embættismönnum hjá Manitoba-fylki og hjá borgaryfirvöldum. Einnig hittu þau fulltrúa atvinnulífsins með það að markmiði að styrkja tengsl og vekja athygli á viðskiptatækifærum á Norðurlöndum. Haldinn var umræðufundur um öryggis- og varnarmál á norðurslóðum í Háskólanum í Manitoba. Winnipeg er þekkt fyrir að vera höfuðból Vestur-Íslendinga.

Osló

Sendiráð Íslands í Osló, í samstarfi við Reykjavíkur Akademíuna, stóð fyrir málstofu um norræna arfleifð og norrænar sjálfsmyndir þar sem fræðafólk kynnti rannsóknir sínar um m.a. norrænar bókmenntir. Ragnar Kristjánsson, sendiherra Íslands í Osló, ávarpaði gesti.

Sendiherra fundaði með forseta Stórþingsins, Masud Gharahkhani. Á fundinum ræddu þeir samskipti Íslands og Noregs og mikilvægi norræns samstarfs.

Í vikunni átti sér stað ráðherrafundur Norræna varnarsamstarfsins NORDEFCO og ráðstefna um öryggis- og varnarmál sem bar heitið International Sea Power Conference.

París

Marta Jónsdóttir, staðgengill sendiherra í París, sótti umræðufund kvenkyns diplómata sem Brigitte Macron, forsetafrú Frakklands, stóð fyrir í Élysée forsetahöllinni.

Róm

Hanna Katrín Friðriksson, atvinnuvegaráðherra, sótti Róm heim ásamt viðskiptasendinefnd frá ítalska-íslenska viðskiptaráðinu. Tilgangur ferðarinnar var að efla tengsl við viðskiptaaðila á Ítalíu og kynnast viðskiptatækifærum á Ítalíu. Sendinefndin heimsótti m.a. stofnanir Sameinuðu þjóðanna í Róm. Guðmundur Árnason, sendiherra Íslands á Ítalíu, kynnti starfsemi sendiráðsins og fastanefndar Íslands gagnvart stofnunum Sameinuðu þjóðanna þar í borg.

Nýlega fóru frulltrúar norrænu fastanefndanna í Róm gagnvart Matvælaaðstoð Sameinuðu þjóðanna (World Food Programme) og utanríkisráðuneyta Norðurlanda í sameiginlega vettvangsferð til Sýrlands og Líbanons. Tilgangurinn var að kanna ástand mannúðarmála og starfsemi stofnananna í ríkjunum tveimur. Guðmundur Árnason, sendiherra og fastafulltrúi, tók þátt í heimsókninni.

Stokkhólmur

Elín R. Sigurðardóttir, sendiherra okkar í Stokkhólmi, sótti sameiginlegan sendiherrafund Norðurlanda, Eystrasaltsríkja, Þýskalands og Póllands með forsætisráðherra Svíþjóðar, Ulf Kristersson. Á fundinum ræddu sendiherrar norrænt samstarf í öryggis- og varnarmálum og áframhaldandi stuðning við Úkraínu.

Sendiherra sótti einnig ráðstefnuna Nordic Compass í Gautaborg þar sem fulltrúar norræns ativnnulífs ræddu m.a. samkeppnishæfni og frumkvöðlastarfsemi á Norðurlöndum.

Tókýó

Hreinn Pálsson, sendiherra Íslands í Tókýó, studdi nýlega við heimsókn Elizu Reid, rithöfund og fyrrum forsetafrú Íslands, til Japans. Eliza ávarpaði gesti og tók þátt í umræðum á málstofu um menningarmál og kynjajafnrétti sem Sendiráð Íslands í Tókýó og Sasakawa friðarstofnunin stóðu fyrir. Auk Elizu Reid ávarpaði Takamado, prinsessa, gesti og tók þátt í umræðum á málstofunni.

Varsjá

Ráðstefnan Endurreisum Úkraínu fer nú fram í Varsjá þar sem fjöldi fulltrúa stjórnvalda, fyrirtækja og alþjóðlegra samtaka koma saman til þess að ræða enduruppbyggingu Úkraínu. Sendiráðsteymið okkar tekur virkan þátt í ráðstefnunni.

Washington

Árlegt samráð Íslands og Bandaríkjanna á sviði öryggis- og varnarmála var haldið í Reykjavík og Keflavík. Þar var farið yfir þróun öryggismála í Evrópu sem og á alþjóðavettvangi, með áherslu á aukið samstarf ríkjanna á norðurslóðum og vettvangi Atlantshafsbandalagsins. Svanhildur Hólm Valsdóttir, sendiherra Íslands í Bandaríkjunum, tók þátt í samráðinu.
Var efnið hjálplegt?