Auglýst eftir umsóknum um styrki úr afrekssjóði í skák fyrir árið 2027
Mennta- og barnamálaráðuneytið auglýsir eftir umsóknum um styrki úr afrekssjóði í skák. Styrkjunum er ætlað að styrkja afreksskákfólk og efnilegt skákfólk sem stefnir að alþjóðlegum árangri og bæta árangur keppnisfólks í skák.
Markmið afrekssjóðs í skák er að búa afreksskákfólki og efnilegu skákfólki fjárhagslega og faglega umgjörð til að hámarka árangur sinn í skák.
Ný lög um skák nr. 100/2024 tóku gildi 1. febrúar 2025, lögunum fylgir reglugerð nr. 1325/2024.
Styrkir eru veittir til skilgreindra verkefna og taka mið af væntum árangri umsækjenda það árið. Fjárveiting til afrekssjóðs í skák er samkvæmt fjárlögum 42,4 m.kr. Styrkveitingar verða ákvarðaðar í samræmi við reglugerð um afrekssjóð í skák, þriggja ára stefnu um úthlutun og áherslur sem ákveðnar eru ár hvert vegna úthlutunar styrkja úr sjóðnum.
Helstu áherslur ársins 2027 eru að miðað er við að heildarstyrkupphæð deilist 90% til afreksskákfólks og 10% til efnilegs skákfólks. Miðað er við að afreksskákfólk fái um 580 þúsund á mánuði og efnilegt skákfólk um 200 þúsund.
Alþjóðleg kappskákmót hafa hærra vægi við mat á umsóknum.
Kostnaður við ferðalög er innifalinn í styrk.
Styrkjum er úthlutað einu sinni á ári og skulu veittir í þrjá til tólf mánuði í senn. Í undantekningartilfellum er heimilt að veita styrki í styttri eða lengri tíma en þó aldrei lengur en þrjú ár.
Umsóknarfrestur er til og með 31. október 2026.