Tilnefningar til menningarverðlauna Norðurlandaráðs 2026

Tilnefningar til menningarverðlauna Norðurlandaráðs 2026 hafa nú allar verið kynntar en alls eru sjö íslensk verk tilnefnd í fjórum flokkum; bókmenntum, barna- og unglingabókmenntum, tónlist og kvikmyndum.

Tilkynnt verður um verðlaunahafa ársins 2026 hinn 20. október og verðlaunin afhent við hátíðlega athöfn á þingi Norðurlandaráðs í Helsinki 27. október.

Íslensku tilnefningarnar

Til bókmenntaverðlauna Norðurlandaráðs eru tilnefndar skáldsögurnar Eldri konur eftir Evu Rún Snorradóttur og Himintungl yfir heimsins ystu brún eftir Jón Kalman Stefánsson.

Tvær íslenskar bækur eru tilnefndar til barna- og unglingabókmenntaverðlaunanna: myndabókin Árstíðarverur eftir Diljá Hvannberg Gagu, með myndskreytingum Linn Janssen, og Skólastjórinn eftir Ævar Þór Benediktsson, með myndskreytingum Elínar Elísabetar Einarsdóttur.

Tónskáldin Bergrún Snæbjörnsdóttir og Ingibjörg Turchi eru tilnefnd til tónlistarverðlaunanna. Bergrún er tilnefnd fyrir Intraloper og Ingibjörg fyrir Stropha.

Kvikmyndin Ástin sem eftir er er framlag Íslands til kvikmyndaverðlaunanna. Tilnefnd eru Hlynur Pálmason, leikstjóri og handritshöfundur, og framleiðendurnir Anton Máni Svansson og Katrin Pors.

Íslensk verk hafa 21 sinni hlotið verðlaunin

Verðlaun Norðurlandaráðs eru meðal virtustu menningarverðlauna Norðurlanda og er ætlað að vekja athygli á framúrskarandi norrænni listsköpun og efla norrænt menningarsamstarf. Bókmenntaverðlaunin hafa verið veitt frá árinu 1962, tónlistarverðlaunin frá árinu 1965, kvikmyndaverðlaunin bættust við árið 2002 og barna- og unglingabókmenntaverðlaunin árið 2013.

Verðlaunafé í hverjum flokki nemur 300 þúsund dönskum krónum. Nánar um verðlaun Norðurlandaráðs.

Íslensk verk  sem hlotið hafa verðlaun Norðurlandaráðs:

• Bókmenntaverðlaunin – átta sinnum: Ólafur Jóhann Sigurðsson fyrir Að laufferjum og Að brunnum (1976), Snorri Hjartarson fyrir Hauströkkrið yfir mér (1981), Thor Vilhjálmsson fyrir Grámosinn glóir (1988), Fríða Á. Sigurðardóttir fyrir Meðan nóttin líður (1992), Einar Már Guðmundsson fyrir Engla alheimsins (1995), Sjón fyrir Skugga-Baldur (2005), Gyrðir Elíasson fyrir Milli trjánna (2011) og Auður Ava Ólafsdóttir fyrir Ör (2018).
• Barna- og unglingabókmenntaverðlaunin – tvisvar: Arnar Már Arngrímsson fyrir Sölvasögu unglings (2016) og Rán Flygenring fyrir Eldgos (2023).
• Tónlistarverðlaunin – sjö sinnum: Atli Heimir Sveinsson fyrir Konsert fyrir flautu og hljómsveit (1976), Hafliði Hallgrímsson fyrir Poemi (1986), Björk Guðmundsdóttir (1997), Haukur Tómasson fyrir Guðrúnarljóð (2004), Anna Þorvaldsdóttir fyrir Dreymi (2012), Gyða Valtýsdóttir (2019) og Víkingur Heiðar Ólafsson (2025).
• Kvikmyndaverðlaunin – fjórum sinnum: Hross í oss (2014), Fúsi (2015), Kona fer í stríð (2018) og Dýrið (2022).