Ráðstefna um menningu og listir á Vestfjörðum 26. nóvember

Menningar-, nýsköpunar- og háskólaráðuneytið stendur fyrir ráðstefnu um menningu, listir og skapandi greinar á Vestfjörðum fimmtudaginn 26. nóvember í Edinborgarhúsinu á Ísafirði.

Skráning er nauðsynleg, en ráðstefnan er opin öllum á meðan húsrúm leyfir og þátttaka er að kostnaðarlausu. Gestir greiða sjálfir fyrir kvöldverð og er sérstök skráning í hann á sama hlekk. Opið er fyrir skráningu til mánudagsins 23. nóvember.

Skráning

Markmið ráðstefnunnar er að leiða saman listafólk, menningarstofnanir, hagaðila, sveitarfélög og ráðuneyti til samtals um stöðu, styrkleika og framtíðartækifæri á Vestfjörðum.

Á ráðstefnunni verður sjónum beint að því hvernig efla megi menningarstarf og skapandi greinar á svæðinu, styrkja innviði og skapa fjölbreyttari tækifæri til listsköpunar og menningarþátttöku. Sérstök áhersla verður lögð á mikilvægi menningar fyrir lífsgæði, byggðaþróun og öflug samfélög, auk þess sem fjallað verður um hvernig tryggja megi aðgengi að listum og menningu óháð búsetu og efnahag.

Viðburðurinn er liður í vinnu ráðuneytisins við að efla samtal við menningarlífið um land allt og byggja upp stuðningskerfi sem tekur mið af sérstöðu, styrkleikum og þörfum hvers landshluta.

Ráðstefnan er haldin í samstarfi við Ísafjarðarbæ, Vestfjarðastofu og Edinborgarhúsið. Hægt verður að fylgjast með ráðstefnunni í beinu streymi.