Beiðni um leiðréttingu á uppgjöri vegna inneignar virðisaukaskatts

[…]
[…]
[…]
[…]

Reykjavík 8. september 2015
Tilv.: FJR14090063/16.2.2

Efni: Beiðni um leiðréttingu á uppgjöri vegna inneignar á virðisaukaskatti [X], kt. […].


Ráðuneytið vísar til bréfs yðar, dags. 15. september 2014, sem barst ráðuneytinu sama dag. Með bréfinu er óskað eftir leiðréttingu á uppgjöri vegna inneignar félagsins, [X], kt. […], í virðisaukaskatti. Í bréfinu er vísað til leiðréttingar á virðisaukaskattskýrslum fyrirtækisins eftir kærumeðferð hjá ríkisskattstjóra.

Málavextir og málsástæður:
Þann 15. september 2014 móttók ráðuneytið erindi yðar þar sem kærð er ákvörðun tollstjóra frá 16. júní 2014 varðandi gildisdagsetningar inneigna í virðisaukaskatti félagsins. Kærandi skilaði leiðréttingarskýrslum virðisaukaskatts vegna ársins 2005 í desember 2008 og í desember 2011 skilaði kærandi leiðréttingarskýrslum virðisaukaskatts vegna áranna 2006-2009. Í bréfi tollstjóra frá 16. júní 2014 kemur fram að ríkisskattstjóri hafi gert vissar breytingar á gildisdagsetningum eftir að tollstjóri óskaði eftir endurskoðun ríkisskattstjóra á þeim. Kærandi var auk þess upplýstur um skuldastöðu félagsins eftir breytingarnar.

Kærandi átti fund með starfsmanni ráðuneytisins þann 23. febrúar 2015 þar sem hann átti þess kost að skýra mál sitt. Á fundinum kom m.a. fram að kærandi telur að verklagsreglur um gildisdagsetningar sem ríkisskattstjóri hefur sett sér eigi enga stoð í lögum. Í virðisaukaskattsskilum sé tímabilið tveir mánuðir. Eina tilvikið sem skattstjóri hafi einhverja lagaheimild til að hreyfa við því sé í sambandi við inneignarskýrslur. Ef skattgreiðandi eigi þannig innskatt geti skattstjóri heimilað að hann verði greiddur út á mánaðarfresti. Kærandi sagði að auki á fundinum að tollstjóri færi að hans mati frjálst með túlkun 25. gr. laga nr. 50/1988, um virðisaukaskatt, sem hann vísaði í um gildisdagsetningar í virðisaukaskatti. Þannig hafi hann fengið dráttarvexti á það sem hann skuldaði. Unnt er að lesa úr orðum kæranda að hann telji að misræmi sé á meðferð skattyfirvalda á greiðsluskýrslum og inneignarskýrslum, þar sem dráttarvextir leggist á greiðsluskýrslur en ekki inneignarskýrslur. Hann fari því fram á að dráttarvextir sem reiknuðust vegna breytinganna verði felldir niður.

Fjármála- og efnahagsráðuneytið óskaði eftir því með bréfi, dags. 16. september 2014, að tollstjóri gæfi umsögn um kæru yðar.

Í umsögn tollstjóra er barst ráðuneytinu þann 3. október 2014 kemur fram að hann telur ekki vera forsendur til að hnika niðurstöðu í fyrrgreindu bréfi til kæranda dags. 16. júní 2014. Ekki verði annað séð en að ríkisskattstjóri hafi meðhöndlað leiðréttingarskýrslur kæranda í samræmi við verklagsreglur ríkisskattstjóra frá 2009 en samkvæmt þeim er gildisdagsetning færsludagur eða í síðasta lagi 90 dögum eftir móttöku skýrslna. Í tilviki kæranda fengu inneignir þær sem mynduðust við skil leiðréttingarskýrslnanna gildisdag þremur mánuðum frá því þær voru mótteknar.

Niðurstaða:
Í IX. kafla laga nr. 50/1988, um virðisaukaskatt, er kveðið á um uppgjörstímabil, gjalddaga, álag, kærur o.fl. Ákvæði um dráttarvexti vegna síðbúinnar greiðslu skattaðila á virðisaukaskatti og vegna síðbúinnar endurgreiðslu af hálfu ríkissjóðs er að finna í 28. gr. laganna. Þannig kemur fram í 1. mgr. hennar að ef virðisaukaskattur er ekki greiddur innan mánaðar frá gjalddaga skuli greiða ríkissjóði dráttarvexti af því sem gjaldfallið er. Sama gildi ef endurgreiðsla hafi verið of há. Samkvæmt 4. mgr. ákvæðisins skal ríkissjóður greiða dráttarvexti í samræmi við 1. mgr. sömu greinar af endurgreiðslu skv. 25. gr. laganna ef hún er ekki innt af hendi innan 21 dags frá lokum frests samkvæmt sömu grein.

Með vísan til framangreinds er ekki fallist á með kæranda að beiting dráttarvaxta og aðferð við skuldajöfnun hjá innheimtumanni ríkissjóðs hafi brotið gegn lögum. Inneignir þær sem mynduðust við leiðréttingu á uppgjöri félagsins í virðisaukaskatti hefðu ekki átt að fá sömu gildisdagsetningar og gjalddagar viðkomandi virðisaukaskattstímabila líkt og kærandi heldur fram, þar sem enga slíka reglu er að finna í lögum nr. 50/1988, um virðisaukaskatt. Þvert á móti leiðir af 1. mgr. 25. gr. laganna að dráttarvextir leggjast á endurgreiðslu ef hún er ekki innt af hendi innan 21 dags frá gildisdagsetningu þeirri sem ákvörðuð er af ríkisskattstjóra í samræmi við verklagsreglur þar um.

Beðist er velvirðingar á því hve lengi hefur dregist að senda kæranda úrskurð þennan.

Úrskurðarorð:
Ákvörðun tollstjóra frá 16. júní 2014 um gildisdagsetningar inneigna í virðisaukaskatti félagsins er staðfest.

Fyrir hönd ráðherra