1392/2026. Úrskurður frá 29. september 2026
Hinn 29. september 2026 kvað úrskurðarnefnd um upplýsingamál upp svohljóðandi úrskurð nr. 1392/2026 í máli ÚNU 26090012.
Kæra og málsatvik
Með erindi, dags. 14. september 2026, kærði […] til úrskurðarnefndar um upplýsingamál ákvörðun Vegagerðarinnar að synja beiðni hans um upplýsingar.
Með erindi til Vegagerðarinnar, dags. 7. september 2026, óskaði kærandi eftir nöfnum, starfsheiti og heimilisfangi allra umsækjenda um stöðu starfsmanns á vélaverkstæði Vegagerðarinnar […]. Kærandi var meðal umsækjenda um starfið. Beiðninni var hafnað hinn 14. september 2026 á grundvelli 17. gr. stjórnsýslulaga, nr. 37/1993.
Óþarft er að rekja frekar það sem fram kemur í gögnum málsins, sbr. 31. gr. stjórnsýslulaga. Úrskurðarnefndin hefur tekið mið af öllum gögnum málsins við úrlausn þess.
Niðurstaða
Samkvæmt 2. mgr. 1. gr. stjórnsýslulaga, nr. 37/1993, gilda stjórnsýslulögin þegar stjórnvöld taka ákvarðanir um rétt eða skyldu manna. Í athugasemdum við þetta ákvæði sem fylgdu frumvarpinu sem varð að stjórnsýslulögum kemur fram að hér undir falli m.a. ákvarðanir um skipun, setningu og ráðningu opinberra starfsmanna, svo og lausn þeirra frá störfum.
Fyrir liggur að kærandi sótti um starf hjá Vegagerðinni, sem telst til stjórnvalda í framangreindum skilningi. Ákvörðun Vegagerðarinnar um ráðningu í það starf sem kærandi sótti um telst jafnframt ákvörðun um rétt eða skyldu í skilningi stjórnsýslulaganna. Um ráðninguna og ráðningarmálið giltu því ákvæði stjórnsýslulaganna.
Samkvæmt fyrri málslið 2. mgr. 4. gr. upplýsingalaga, nr. 140/2012, gilda þau lög ekki um aðgang að upplýsingum samkvæmt stjórnsýslulögum. Í 15. gr. stjórnsýslulaganna er að finna lagaákvæði sem fjallar um upplýsingarétt aðila stjórnsýslumáls. Í 1. málsl. 1. mgr. þess ákvæðis segir: „Aðili máls á rétt á aðgangi að skjölum og öðrum gögnum er mál varða.“ Þessi upplýsingaréttur sætir svo vissum takmörkunum, sem lýst er í 16. og 17. gr. laganna.
Kærandi telst, vegna umsóknar sinnar um framangreinda stöðu hjá Vegagerðinni, vera aðili að ráðningarmálinu í skilningi stjórnsýslulaganna ásamt öðrum umsækjendum um stöðuna. Réttur hans til aðgangs að gögnum ráðningarmálsins ræðst þar með af ákvæðum stjórnsýslulaganna en ekki af ákvæðum upplýsingalaga. Úrlausn um beitingu stjórnsýslulaga að þessu leyti á ekki undir úrskurðarnefnd um upplýsingmála, sbr. 1. mgr. 20. gr. upplýsingalaga. Ber því að vísa kærunni frá úrskurðarnefndinni.
Úrskurðarorð
Kæru […], dags. 14. september 2026, vegna synjunar Vegagerðarinnar á beiðni hans um aðgang að gögnum, er vísað frá úrskurðarnefnd um upplýsingamál.
Trausti Fannar Valsson, formaður
Hafsteinn Þór Hauksson
Sigríður Árnadóttir