Efnisorð
Tegund

Leita eftir efnisorðum

Sýnir 551–600 af 2554
Raða eftir:
29. feb. 2024Heilbrigðisráðuneytið, Líf og heilsa

Tímamótasamningur um nám í heyrnarfræðum á háskólastigi

Heyrnar- og talmeinastöð Íslands (HTÍ), Háskólinn í Örebro í Svíþjóð og Háskólinn á Akureyri hafa gert með sér samning sem gerir kleift að bjóða upp á háskólanám í heyrnarfræðum í fyrsta sinn hér á landi. Samningurinn var undirritaður í dag. Willum Þór Þórsson heilbrigðisráðherra segir samninginn marka tímamót: „Það hefur verið skortur á sérþjálfuðum heyrnarfræðingum hér á landi. Nú má vænta þess að þeim fjölgi á næstu árum og að hægt verði að stórbæta þjónustu við fólk með heyrnarskerðingu hér á landi.“

28. feb. 2024Heilbrigðisráðuneytið, Líf og heilsa

Starfshópi falið að uppfæra heildarstefnu í áfengis- og vímuvörnum

Willum Þór Þórsson heilbrigðisráðherra hefur skipað starfshóp til að móta heildarstefnu í áfengis- og vímuvörnum. Stefnan á að taka til forvarna, meðferðar og eftirfylgni, endurhæfingar og lagaumhverfis. Jafnframt er gert ráð fyrir að hún taki mið af mismunandi þörfum ólíkra hópa: „Sú stefna sem unnið hefur verið eftir undanfarin ár er frá árinu 2013. Endurskoðun er því tímabær í ljósi margvíslegra breytinga sem orðið hafa á undanförnum árum, hvort sem litið er til samfélagslegra breytinga, viðhorfa til áfengis- og vímuefnavanda eða þekkingar á sviði forvarna og meðferðar. Ég vænti mikils af hópnum því þetta er mikilvægt samfélagslegt málefni og því brýnt að gera betur“ segir Willum Þór.

28. feb. 2024Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 6/2024

Kærandi kærði vinnubrögð embættis landlæknis og Heilbrigðisstofnunar Vesturlands vegna samskipta stofnananna við kæranda um heilbrigðisþjónustu sem mági kæranda var veitt á HVE á Akranesi árið 2022. Taldi kærandi að þau svör sem hann hefði fengið frá áðurgreindum stofnunum væru ófullnægjandi. Í úrskurði ráðuneytisins kom fram að annars vegar væri um að ræða almennar athugasemdir við þjónustu til HVE og hins vegar almennar athugasemdir við aðstöðu og þjónustu til embættis landlæknis. Þar sem svör við almennum athugasemdum um þjónustu til stjórnar heilbrigðisstofnunar er ekki stjórnvaldsákvörðun og þar sem kærandi getur ekki talist aðili að eftirlitsmáli embættis landlæknis vegna aðbúnaðs stofnunar var kæru kæranda vísað frá ráðuneytinu.

22. feb. 2024Heilbrigðisráðuneytið, Líf og heilsa

Ráðherra styrkir frumkvöðlaverkefni um niðurtröppun ópíóíða

Willum Þór Þórsson heilbrigðisráðherra hefur ákveðið að styrkja tilraunaverkefni um nýja þjónustu við einstaklinga sem taka sterk verkjalyf eða svefn- og róandi lyf að staðaldri og vilja aðstoð til að hætta eða draga úr notkun þeirra. Verkefnið er liður í aðgerðaáætlun stjórnvalda til að sporna við skaða af völdum ópíóíðafíknar. Heilsugæsla höfuðborgarsvæðisins, Heilsugæslan Urðarhvarfi og Reykjanesapótek standa saman að verkefninu í samstarfi við sprotafyrirtækið Prescriby sem hefur þróað hugbúnaðinn sem verkefnið byggir á. Læknar og lyfjafræðingar munu sinna þjónustunni sem felst í persónusniðinni meðferðaráætlun fyrir þá einstaklinga sem munu nýta sér hana, fræðslu og eftirfylgd.

22. feb. 2024Heilbrigðisráðuneytið, Líf og heilsa, Umhverfis-٫ orku- og loftslagsráðuneytið, Atvinnuvegaráðuneytið

Ný aðgerðaáætlun heilbrigðisráðherra til að sporna við útbreiðslu sýklalyfjaónæmis

Þverfaglegur starfshópur skipaður af Willum Þór Þórssyni heilbrigðisráðherra í samvinnu við matvæla- og landbúnaðarráðherra og umhverfis- orku- og loftslagsráðherra, leggur til að ráðist verði í víðtækar aðgerðir hér á landi til að sporna við útbreiðslu sýklalyfjaónæmra baktería. Útbreiðsla þeirra er enn sem komið er minni hér á landi en í mörgum öðrum löndum en hefur aukist á undanförnum árum. Mikilvægt er að Ísland haldi góðri stöðu sinni til að tryggja öryggi sjúklinga, standa vörð um starfsemi heilbrigðis- og umönnunarstofnana og sporna við auknum kostnaði í heilbrigðiskerfinu sem er óhjákvæmilegur fylgifiskur sýklalyfjaónæmis.

20. feb. 2024Dómsmálaráðuneytið, Félags- og húsnæðismálaráðuneytið, Menningar-٫ nýsköpunar- og háskólaráðuneytið, Heilbrigðisráðuneytið, Innviðaráðuneytið, Mennta- og barnamálaráðuneytið, Útlendingar, Innflytjendur, Flóttafólk

Heildarsýn í útlendingamálum

Ríkisstjórnin sammæltist í dag um aðgerðir í málefnum umsækjenda um alþjóðlega vernd, flóttafólks og innflytjenda. Á grundvelli þeirra aðgerða verður tekið utan um málaflokkinn með heildstæðum hætti með aukinni samhæfingu á milli ráðuneyta og stofnana. Markmiðið er að stuðla að betri, skilvirkari og skýrari framkvæmd innan málaflokksins, og bættri þjónustu til að renna styrkari stoðum undir stjórn útlendingamála. Með þessari heildarsýn er lögð áhersla á mannúð og virðingu og unnið gegn skautun í íslensku samfélagi. Horft er sérstaklega til framkvæmdar þessara mála á Norðurlöndum þannig að aukið samræmi sé á milli landa.

19. feb. 2024Félags- og húsnæðismálaráðuneytið, Líf og heilsa, Fatlað fólk, Heilbrigðisráðuneytið, Almannatryggingar og lífeyrir

Yfirlýsing undirrituð um samstarf þjónustukerfa á sviði endurhæfingar

Heildstæð nálgun, samvinna kerfa og samfella í þjónustu verða leiðarstefin í endurhæfingu fólks samkvæmt viljayfirlýsingu sem hefur verið undirrituð. Einstaklingar í endurhæfingu skulu markvisst leiddir milli þjónustukerfa þurfi þeir á þjónustu fleiri en eins kerfis að halda og skýrt verður hvernig ábyrgð á þjónustunni færist á milli kerfa.

16. feb. 2024Heilbrigðisráðuneytið, Líf og heilsa

Ungmennaráð heimsmarkmiðanna átti fund með heilbrigðisráðherra

Willum Þór Þórsson heilbrigðisráðherra fundaði í dag með fulltrúum ungmennaráðs heimsmarkmiðanna. Á fundinum afhentu þau ráðherra tillögur frá börnum og ungmennum um ýmis verkefni sem snerta heilbrigði barna og ungs fólks um allt land. „Þetta var virkilega gagnlegur og skemmtilegur fundur með þessum flottu fulltrúum yngri kynslóðarinnar. Þau hafa sterkar skoðanir, þau vilja hafa áhrif, þau hafa brennandi áhuga á aðgerðum stjórnvalda, sjálfbærri þróun og eru afar vel að sér um heimsmarkmið Sameinuðu þjóðanna. Það býr mikill kraftur í þessum krökkum og þau fylla mig bjartsýni á framtíðina“ sagði Willum Þór að loknum fundinum.

16. feb. 2024Heilbrigðisráðuneytið, Líf og heilsa

Framúrskarandi Landspítali - grein eftir Willum Þór Þórsson heilbrigðisráðherra

Willum Þór Þórsson heilbrigðisráðherra fjallar í blaðagrein í dag um breytingar á stjórnskipulagi Landspítala, innleiðingu þjónustutengdrar fjármögnunar og margvísleg umbótaverkefni sem hafa skilað góðum árangri: ,,Í ljósi þeirra umbóta sem átt hafa sér stað á Landspítala þá er afar ánægjulegt að rýna í starfsemistölur spítalans á árinu 2023 og sjá að þessar breytingar og aðgerðir eru að bera raunverulegan árangur. Afköst spítalans hafa aukist umtalsvert á sama tíma og spítalinn skilaði hagstæðri rekstrarafkomu sem nemur, samkvæmt bráðabirgðauppgjöri, rúmum 600 milljónum króna."

12. feb. 2024Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 28/2024

Útdráttur: Kærandi kærði ákvörðun embættis landlæknis um að synja henni um starfsleyfi sem sálfræðingur. Embættið byggði ákvörðun sína á því að nám kæranda uppfyllti ekki skilyrði reglugerðar nr. 1130/2012 til að hljóta starfsleyfi, enda væri það nám sem hún hefði stundað erlendis verulega frábrugðið því námi sem krafa væri gerð um í reglugerðinni. Kærandi taldi að embættið þyrfti að túlka aðstæður hennar með rýmri hætti. Í úrskurði ráðuneytisins kom fram að skýrt væri kveðið á um kröfur sem gerðar væru til menntunar til að hljóta starfsleyfi sem sálfræðingur í reglugerð nr. 1130/2012. Þar sem nám kæranda var verulega frábrugðið þeim kröfum sem gerðar væru í reglugerð, bæði að umfangi og efni, var það niðurstaða ráðuneytisins að staðfesta ákvörðun embættisins um synjun starfsleyfis.

02. feb. 2024Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 5/2024

Kærð var ákvörðun Landspítala um að hafna endurgreiðslu komugjalda þar sem sjúklingur taldi sig hafa verið inniliggjandi á spítalanum þrátt fyrir að vera staðsett heima hjá sér. Í úrskurði ráðuneytisins var litið til þess að sjúklingurinn var ekki krafinn um greiðslu fyrir komu sína upphaflega á Landspítala. Hún hafi hins vegar ekki geta haft væntingar til þess að síðari komur hennar á Landspítala væru henni einnig að kostnaðarlausu eftir að hún var komin heim á leið aftur enda hefði innlögn hennar, ef af henni hefði orðið, ekki orðið það löng að hún hefði náð til þeirra daga sem hún kom til að sækja heilbrigðisþjónustu á Landspítala í kjölfarið.

31. jan. 2024Heilbrigðisráðuneytið, Líf og heilsa

Umframdauðsföll hlutfallslega næstfæst á Íslandi

Nýleg skýrsla Efnahags- og framfarastofnunarinnar (OECD) bendir til þess að sóttvarnaaðgerðir á Íslandi á tímum heimsfaraldurs Covid-19 hafi verið árangursríkar. Niðurstaðan leiðir í ljós að af OECD-ríkjunum voru dauðsföll á Íslandi á Covid-19 tímanum færri en búast hefði mátt við miðað við fólksfjölgun og aldurssamsetningu þjóðarinnar. Aðeins á Nýja-Sjálandi var hlutfall umframdauðsfalla lægra.

23. jan. 2024Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 4/2024

Kærandi, sem er læknir, kærði ákvörðun embættis landlæknis um að áminna hann og veita honum tilmæli. Áminningu landlæknis var að rekja til eftirlitsmáls, á grundvelli III. kafla laga um landlækni og lýðheilsu, sem embættið hafði stofnað í kjölfar tilkynninga sem bárust því. Í eftirlitsmáli embættisins gagnvart kæranda varð niðurstaðan sú að kærandi hefði brotið gegn skyldum sínum sem læknir með því að ávísa óhóflegu magni af ávana- og fíknilyfjum til hluta sjúklinga sinna. Sérstaklega var sú heilbrigðisþjónusta sem hann veitti einum skjólstæðing sínum ámælisverð. Þá var eftirfylgni kæranda með öllum sjúklingum hans ábótavant auk þess sem skráning kæranda í sjúkraskrá vegna sjúklinga hans var ófullnægjandi. Var ákvörðun embættis landlæknis staðfest.

23. jan. 2024Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 3/2024

Kærandi kærði málsmeðferð embættis landlæknis í kvörtunarmáli skv. 12. gr. laga um landlækni og lýðheilsu, en embættið hafði gefið út álit án þess að afla umsögn óháðs sérfræðings. Taldi kærandi að það kæmi í veg fyrir að hlutleysis væri gætt. Í úrskurði ráðuneytisins kom fram að embætti landlæknis bæri ekki skylda til að afla umsagnar óháðs sérfræðings samkvæmt 12. gr. laga um landlækni og lýðheilsu. Það væri hluti af rannsóknarskyldu embættisins að kanna hvort slík umsögn væri nauðsynleg við útgáfu álits. Í málinu reyndi á almenna þekkingu á starfsskyldum lækna sem talið var að væri fyrir hendi hjá embætti landlæknis. Taldi ráðuneytið því að embættinu hafi ekki borið að afla umsagnar óháðs sérfræðings. Var málsmeðferð embættis landlæknis staðfest.

16. jan. 2024Úrskurðir heilbrigðisráðuneytis, Úrskurðir, Heilbrigðisráðuneytið

Úrskurður nr. 2/2024

Kærandi kærði málsmeðferð embættis landlæknis í kvörtunarmáli skv. 12. gr. laga um landlækni og lýðheilsu, en embættið hafði ekki tekið kvörtunina til efnislegrar meðferðar. Í úrskurði ráðuneytisins var talið að kvörtun þyrfti að gefa einhverju móti til kynna, á því sviði heilbrigðisþjónustu sem um ræðir, að hún varðaði meint mistök eða vanrækslu við veitingu þeirrar þjónustu til að falla undir gildissvið 2. mgr. 12. gr. laga um landlækni og lýðheilsu. Ráðuneytið féllst á með embætti landlæknis að ekkert í gögnum málsins renndi stoðum undir meint mistök eða vanrækslu. Embætti landlæknis hafi því verið heimilt að ljúka málinu með bréfi til kæranda og málsmeðferð í málinu staðfest.

11. jan. 2024Félags- og húsnæðismálaráðuneytið, Málefni eldra fólks, Líf og heilsa, Heilbrigðisráðuneytið

Gott að eldast: Starfshópur um eflingu og þróun dagdvala á landsvísu

Willum Þór Þórsson hefur skipað starfshóp til að vinna að framgangi aðgerðar A.3 í áætluninni Gott að eldast sem fjallar um eflingu og þróun dagdvala á landsvísu. Áformað er að gera fleirum kleift að nýta dagdvalarþjónustu, m.a. með öflugu samstarfi milli dagdvala og heimaþjónustu sveitarfélaga. Markmiðið er að koma sem best til móts við þarfir eldra fólks sem býr heima og fjölskyldur þess, sem eykur möguleika einstaklinganna á að búa lengur heima í stað þess að flytja á hjúkrunarheimili.

11. jan. 2024Heilbrigðisráðuneytið, Líf og heilsa

Áfengis- og vímuefnameðferð á Íslandi – stöðumat

Willum Þór Þórsson heilbrigðisráðherra ákvað á liðnu ári að ráðast í stöðumat á áfengis- og vímuefnameðferð á Íslandi og hvernig meðferðarkerfið á þessu sviði er í stakk búið til að þjóna hlutverki sínu. Að tillögu Geðráðs var leitað til erlends ráðgjafa. Til verksins var fenginn Dr. jur. Thomas Kattau, fyrrum aðstoðarframkvæmdastjóri Pompidou-hópsins sem er samstarfsvettvangur Evrópuráðsins á sviði vímuefnamála. Thomas hefur nú skilað ráðherra skýrslu með niðurstöðum sínum og er hún birt hér með.

11. jan. 2024Heilbrigðisráðuneytið, Norrænt samstarf

Þátttaka samstarfsráðherra Norðurlandarlanda á þingi Norðurlandaráðs í Reykjavík

Willum Þór Þórsson, samstarfsráðherra Norðurlanda og heilbrigðisráðherra, hélt erindi og sat fyrir svörum á þingi Norðurlandaráðs í vikunni en hann hefur undanfarna daga sótt fundi í tengslum við 76. þing Norðurlandaráðs sem að þessu sinni fór fram í Reykjavík dagana 28. – 31. október, undir yfirskriftinni: „Friður og öryggi á norðurslóðum.“ Þingið fer með æðsta ákvörðunarvaldið innan norræns þingsamstarfs og er einstakur vettvangur fyrir svæðisbundið samstarf þar sem saman koma bæði þingfulltrúar Norðurlandaráðs og ráðherrar úr ríkisstjórnum Norðurlanda. Á þinginu koma allir 87 þingmenn Norðurlandaráðs saman, auk fjölda annarra þátttakenda. Ísland fer með formennsku í Norðurlandaráði í ár og hefur Bryndís Haraldsdóttir gegnt starfi forseta og Oddný G. Harðardóttir varaforseta.

02. jan. 2024Heilbrigðisráðuneytið

Evrópustyrkir – auglýst eftir umsóknum innan skamms

Evrópusambandið hefur tilkynnt um fjárhæð styrkja til úthlutunar á sviði verkefna sem rúmast innan heilbrigðisáætlunarinnar EU4Health árið 2024. Íslenskar stofnanir og félagasamtök sem vinna að heilbrigðismálum eiga möguleika á aðild að skilgreindum samstarfsverkefnum eða beinum styrkjum til tiltekinna verkefna. Alls eru þetta 752,4 milljónir evra sem varið verður ýmist til samstarfsverkefna Evrópuþjóða eða í beina styrki til skilgreindra verkefna í heilbrigðismálum.

02. jan. 2024Heilbrigðisráðuneytið, Líf og heilsa

Um 180 milljóna króna viðbótarfjármagn til hjúkrunarheimila

Willum Þór Þórsson heilbrigðisráðherra hefur ákveðið að auka fjármagn til hjúkrunarheimila um 181 milljón króna á þessu ári til að mæta aukinni hjúkrunarþyngd íbúa. Með þessu er mætt ákvæði bókunar sem gerð var við framlengingu samninga Sjúkratrygginga Íslands (SÍ) við rekstraraðila hjúkrunarheimila í mars árið 2022. Með bókuninni er gert ráð fyrir að sýni mælingar á hjúkrunarþyngd (RUG stuðull) þörf fyrir aukið fjármagn komi SÍ þeim upplýsingum á framfæri við heilbrigðisráðherra sem geti þá brugðist við með viðbótarframlagi til rekstrarins. ​

22. des. 2023Heilbrigðisráðuneytið, Líf og heilsa

30 milljónir til verkefna gegn fíknisjúkdómum

Willum Þór Þórsson heilbrigðisráðherra hefur úthlutað 30 milljónum króna í styrki til frjálsra félagasamtaka vegna verkefna sem miða að því að vinna gegn fíknisjúkdómum og þá einkum ópíóíðafíkn. Sex verkefni hlutu styrk. Hæsti styrkurinn, átta milljónir króna, rennur til verkefnis Matthildar, samtaka um skaðaminnkun. Í því felst að koma á fót færanlegu úrræði til að veita fólki sem reykir ópíóíða eða örvandi vímuefni nærþjónustu á forsendum þess með skaðaminnkun að leiðarljósi.

22. des. 2023Heilbrigðisráðuneytið, Líf og heilsa

Nefnd skipuð um stöðu ADHD á landinu

Willum Þór Þórsson heilbrigðisráðherra hefur skipað nefnd til að fjalla um þjónustu og stuðning við einstaklinga með ADHD (athyglisbrest með eða án ofvirkni). Markmið vinnunnar er m.a. að greina stöðu þessara mála hér á landi, lýsa samvinnu helstu kerfa sem snertir fólk með ADHD og þeim áskorunum og tækifærum sem þar leynast. Hópnum er falið að skrifa grænbók um málaflokkinn.

20. des. 2023Heilbrigðisráðuneytið, Líf og heilsa

Aukin greiðsluþátttaka við ferðakostnað vegna heilbrigðisþjónustu innanlands

Willum Þór Þórsson heilbrigðisráðherra hefur með breytingu á reglugerð um ferðakostnað sjúkratryggðra og aðstandenda þeirra innanlands aukið rétt þeirra til endurgreiðslu ferðakostnaðar. Hingað til hafa sjúkratryggingar tekið þátt í kostnaði við tvær ferðir á ári en með breytingunni fjölgar þeim í þrjár. Þetta á við um nauðsynlegar ferðir þar sem eru 20 km. eða lengra milli staða og þjónustan er ekki fyrir hendi í heimabyggð.

18. des. 2023Heilbrigðisráðuneytið, Líf og heilsa

Starfshópur um almenna líknarmeðferð á hjúkrunarheimilum

Willum Þór Þórsson heilbrigðisráðherra hefur skipað starfshóp til að vinna að framgangi líknarmeðferðar á hjúkrunarheimili og setja viðmið um þjónustuna. Vinna hópsins verður byggð á aðgerðaáætlun um líknarmeðerð til ársins 2025 sem kveður á um að líknarmeðferð skuli vera í boði fyrir allt heimilisfólk hjúkrunarheimila sem þarf á henni að halda.

12. des. 2023Heilbrigðisráðuneytið, Líf og heilsa

Ákvörðun heilbrigðisráðuneytis vegna starfsemi Intuens Segulómunar ehf.

Heilbrigðisráðuneytið hefur ákveðið að ekki séu forsendur til að stöðva rekstur Intuens Segulómunar í ljósi þess að fyrirtækið gerði grundvallarbreytingar á starfsemi sinni í framhaldi af samskiptum sínum við ráðuneytið og embætti landlæknis. Embætti landlæknis fór þess á leit við ráðuneytið að starfsemin yrði stöðvuð í ljósi þess að fyrirtækið brást ekki við ítrekuðum erindum og tilmælum landlæknis.

12. des. 2023Heilbrigðisráðuneytið, Líf og heilsa

Samið um uppsteypu rannsóknahúss - stór áfangi í heildaruppbyggingu Landspítala

Willum Þór Þórsson heilbrigðisráðherra og Páll Daníel Sigurðsson, framkvæmdastjóri Eyktar ehf. undirrituðu fyrir helgi samning Nýs Landspítala ohf. um uppsteypu á rannsóknahúsinu. Auk þess vottuðu samninginn Svava María Atladóttir framkvæmdastjóri Þróunar hjá Landspítala og Sólrún Lovísa Sveinsdóttir verkefnastjóri rannsóknahúss hjá NLSH. Willum segir þetta vera stóran áfanga í heildaruppbyggingu Landspítala.

05. des. 2023Heilbrigðisráðuneytið, Líf og heilsa

Norrænt samstarf um heilabilun og kynning á FINGER forvarna- og rannsóknaverkefninu

Þekkt forvarna- og rannsóknaverkefni um heilabilun sem kallast FINGER verður kynnt á opnum fundi þriðjudaginn 16. maí næstkomandi. Verkefnið er finnskt og var þróað og skipulagt af prófessor Miiu Kivipelto. Niðurstöður þess hafa vakið athygli fyrir góðan árangur hjá þátttakendum og orðið að fyrirmynd margra forvarnaverkefna á þessu sviði víða um lönd. Kynningarfundurinn er haldinn í tengslum við árlegan vorfund norræna samstarfshópsins um heilabilun sem fram fer í Reykjavík dagana 15. og 16. maí.

05. des. 2023Heilbrigðisráðuneytið, Líf og heilsa

Stofnuð verði þekkingar- og ráðgjafarmiðstöð um ME-sjúkdóminn

Willum Þór Þórsson heilbrigðisráðherra hefur ákveðið að fela Sjúkrahúsinu á Akureyri í samvinnu við Heilbrigðisstofnun Norðurlands að koma á fót þekkingar- og ráðgjafarmiðstöð um ME sjúkdóminn. Alþjóðlegi ME dagurinn er í dag sem miðar að því að efla vitund um sjúkdóminn sem veldur langvarandi vöðvaverkjum og bólgum í heila eða mænu.

04. des. 2023Heilbrigðisráðuneytið

Til umsagnar: Meðferð umsókna þriðjaríkisborgara um leyfi til að starfa sem heilbrigðisstarfsmenn á Íslandi

Birt hafa verið til umsagnar drög að reglugerð um meðferð umsókna ríkisborgara utan Evrópska efnahagssvæðisins og Sviss (þriðjaríkisborgara) sem vilja starfa hér á landi sem heilbrigðisstarfsmenn. Markmiðið er að einfalda og skýra kröfur til slíkra umsókna og stuðla að aukinni skilvirkni við meðferð þeirra. Umsagnarfrestur er til 16. apríl.

04. des. 2023Heilbrigðisráðuneytið, Líf og heilsa

Til umsagnar: Reglugerð um menntun lækna, lækningaleyfi og sérfræðileyfi

Birt hafa verið til umsagnar drög að nýrri reglugerð um menntun, réttindi og skyldur lækna og skilyrði til að hljóta almennt lækningaleyfi og sérfræðileyfi. Með reglugerðinni er m.a. kveðið ýtarlega á um um faglega umgjörð sérnáms í læknisfræði sem fer fram hér á landi, til samræmis við öra þróun námsins og aukið umfang þess frá því að núgildandi reglugerð nr. 467/2015 var sett árið 2015.

01. des. 2023Heilbrigðisráðuneytið, Líf og heilsa

Sigurður H. Helgason er nýr forstjóri Sjúkratrygginga Íslands

Willum Þór Þórsson heilbrigðisráðherra hefur skipað Sigurð H. Helgason í embætti forstjóra Sjúkratrygginga Íslands frá 1. febrúar næstkomandi. Skipunin er gerð á grundvelli heimildar í 36. gr. laga um réttindi og skyldur starfsmanna ríkisins og Sigurður fluttur úr embætti skrifstofustjóra í fjármála- og efnahagsráðuneytinu. Sigurður tekur við embættinu af Maríu Heimisdóttur sem hefur gegnt embætti forstjóra frá árinu 2018 en hefur nú ákveðið að láta af störfum.

23. nóv. 2023Heilbrigðisráðuneytið, Norrænt samstarf, Líf og heilsa

Svipmyndir frá heilbrigðisþingi

Hátt í 400 manns sóttu heilbrigðisþing sem fram fór í Hörpu í liðinni viku og fjölmargir fylgdust með þinginu í beinu streymi. Þetta er sjötta árið í röð sem heilbrigðisráðherra efnir til heilbrigðisþings þar sem áhersla er lögð á að fjalla um mikilvæg málefni sem varða heilbrigðisþjónustu við landsmenn í nútíð og framtíð. Að þessu sinni var sjónum beint að þeim tækifærum sem felast í nýtingu margvíslegra heilbrigðisgagna, stafrænnar þjónustu og gervigreindar.

21. nóv. 2023Heilbrigðisráðuneytið, Mennta- og barnamálaráðuneytið, Félags- og húsnæðismálaráðuneytið

Stuðningur við Bergið

Bergið headspace fær styrk frá stjórnvöldum til að veita ungu fólki stuðning og ráðgjöf með áherslu á snemmtæka íhlutun til að stuðla að aukinni virkni og vellíðan. Ásmundur Einar Daðason, mennta- og barnamálaráðherra, Willum Þór Þórsson heilbrigðisráðherra og Guðmundur Ingi Guðbrandsson, félags- og vinnumarkaðsráðherra, undirrituðu samning þess efnis við Bergið í dag.