Opið fyrir tilnefningar til verðlauna Jónasar Hallgrímssonar

Opið er fyrir tilnefningar til verðlauna Jónasar Hallgrímssonar og viðurkenningar íslenskrar tungu. Verðlaunin verða afhent á degi íslenskrar tungu, 16. nóvember, en almenningi gefst kostur á að senda ráðgjafarnefnd ábendingar um verðlaunahafa.

Verðlaun Jónasar Hallgrímssonar skal veita einstaklingi sem hefur með eftirtektarverðum hætti unnið íslenskri tungu gagn eða glætt hana nýju lífi, til dæmis með skáldskap, fræðistörfum, kennslu, þýðingum eða á annan hátt stuðlað að framgangi íslenskunnar, eflingu hennar, miðlun eða nýsköpun.

Viðurkenning íslenskrar tungu er veitt hópi, félagi, verkefni, samtökum, fyrirtæki eða stofnun sem hefur sýnt íslenskri tungu ræktarsemi eða stuðning í verki.

Á síðasta ári hlaut Dröfn Vilhjálmsdóttir, bókasafns- og upplýsingafræðingur og umsjónarmaður bókasafns Seljaskóla, verðlaun Jónasar Hallgrímssonar fyrir ötult starf við að efla lestur barna og áhuga þeirra á íslensku. Samtökin ’78 hlutu viðurkenningu íslenskrar tungu fyrir nýyrðasmíði og baráttu fyrir tilvistarrétti hinsegin fólks innan tungumálsins.

Síðasti dagur til að skila inn tilnefningum er 25. október.

Hér má sjá hverjir hafa fengið verðlaun eða viðurkenningu á umliðnum árum.