Dagur íslenskrar tungu: Verðlaunaafhending í Eddu og ákall til Apple

Dagur íslenskrar tungu verður haldinn hátíðlegur mánudaginn næstkomandi í Eddu kl. 15:00, þegar menningar-, nýsköpunar- og háskólaráðherra veitir verðlaun Jónasar Hallgrímssonar í 31. skipti. Við sama tilefni er veitt sérstök viðurkenning íslenskrar tungu. Viðurkenninguna skal veita hópi, félagi, verkefni, samtökum, fyrirtækjum eða stofnunum sem hafa sýnt íslenskri tungu ræktarsemi, vakið athygli á henni eða sýnt henni stuðning í verki.

Meðal fyrri verðlaunahafa eru Dröfn Vilhjálmsdóttir, bókasafns- og upplýsingafræðingur sem hlaut verðlaunin á síðasta ári, Ari Eldjárn uppistandari og frú Vigdís Finnbogadóttir.

Máltækni er mannréttindamál

Markmið dags íslenskrar tungu er að minna á mikilvægi íslenskrar tungu og gleðjast og fagna sögu hennar, samtíð og framtíð. Það er því viðeigandi að við tilefnið verður einnig hrint af stað ákalli til tæknirisans Apple þar sem ráðherra óskar eftir stuðningi landsmanna við að þrýsta á Apple til að innleiða íslensku í stýrikerfi sitt. Framtíð íslenskrar tungu krefst þess að hún verði aðgengileg í nýjustu tækni og framtíð þeirra sem eiga við aðgengi hindranir að stríða er samofin því að sú tækni sé aðgengileg á móðurmálinu.   

Dagurinn er haldinn hátíðlegur á fæðingardegi Jónasar Hallgrímssonar, 16. nóvember ár hvert. Víða er efnt til margvíslegra menningarviðburða í tilefni dagsins.

Viku íslenskunnar 2026

16.–22. nóvember (ásamt tengdum opnunarviðburðum 13.–15. nóvember)