Hoppa yfir valmynd

Kærunefnd jafnréttismála

ÁskriftirÚrskurðir nefndar
Forsætisráðuneytið

Hvað er unnt að kæra til kærunefndar jafnréttismála?

Einstaklingar, fyrirtæki, stofnanir og félagasamtök sem telja að ákvæði jafnréttislaga hafi verið brotin gagnvart sér eða félagsmönnum sínum geta leitað atbeina kærunefndar jafnréttismála, sbr. lög nr. 10/2008 um jafna stöðu og jafnan rétt kvenna og karla. Til nefndarinnar geta þeir einnig leitað sem telja rétti sínum hallað andstætt ákvæðum laga nr. 85/2018 um jafna meðferð óháð kynþætti og þjóðernisuppruna eða laga nr. 86/2018 um jafna meðferð á vinnumarkaði. Þá getur Jafnréttisstofa einnig óskað eftir því að kærunefnd jafnréttismála taki mál til meðferðar á grundvelli framangreindra laga. 

Kærufrestur

Kærur skulu berast nefndinni skriflega innan sex mánaða frá því að ætlað brot á lögum þessum lá fyrir, frá því að ástandi sem talið er brot á lögunum lauk eða frá því að sá er málið varðar fékk vitneskju um ætlað brot. Sé leitað rökstuðnings á grundvelli ákvæða stjórnsýslulaga tekur fresturinn að líða þegar sá rökstuðningur liggur fyrir.

Kærunefndin getur þegar sérstaklega stendur á ákveðið að taka kæru til meðferðar þótt framangreindur frestur sé liðinn, þó aldrei ef liðið er meira en eitt ár.

Kæra telst nægjanlega snemma fram komin ef póststimpill bréfs sýnir að hún hafi verið send nefndinni áður en fresturinn er liðinn.

Málsmeðferð hjá nefndinni

Málsmeðferð fyrir kærunefnd skal að jafnaði vera skrifleg en þó getur nefndin kallað málsaðila eða fulltrúa þeirra á sinn fund. Kærunefndin skal tryggja að aðili máls eigi þess kost að tjá sig um efni máls áður en nefndin kveður upp úrskurð sinn enda telji nefndin að hvorki afstaða hans né rök fyrir henni liggi fyrir í gögnum málsins.

Telji nefndin mál ekki nægilega upplýst getur hún krafist frekari gagna frá málsaðilum og jafnframt getur hún að kröfu gagnaðila krafið aðila um gögn sem áhrif geta haft á úrlausn máls.

Að öðru leyti fer um málsmeðferð hjá nefndinni samkvæmt ákvæðum stjórnsýslulaga og reglugerð um málsmeðferð fyrir kærunefnd jafnréttismála nr. 220/2017.

Niðurstöður kærunefndar sæta ekki kæru til æðra stjórnvalds.

Úrskurðir kærunefndar eru bindandi gagnvart málsaðilum. Málsaðilum er heimilt að bera úrskurði nefndarinnar undir dómstóla.

Málsmeðferðartími

Kærunefnd jafnréttismála skal kveða upp úrskurð svo fljótt sem auðið er og eigi síðar en þremur mánuðum eftir að henni berst mál.

Kostnaður

Málsmeðferð er aðilum máls að kostnaðarlausu.

Eyðublað

  • Rafræn kæra - Innskráning með rafrænum skilríkjum, skil á netinu. 
  • Eyðublað á PDF formi - Nauðsynlegt er að vista eyðublaðið áður en það er fyllt út. Það er síðan prentað út og sent til nefndarinnar (sjá aðsetur hér að neðan).

Einnig liggja kærueyðublöð frammi hjá:

  • Úrskurðarnefnd velferðarmála, Katrínartúni 2, 105 Reykjavík.
  • Jafnréttisstofu, Borgum v/Norðurslóð á Akureyri

Eyðublaðið auðveldar málatilbúnað fyrir nefndinni og tryggir að nauðsynlegar upplýsingar liggi fyrir þegar í upphafi málsmeðferðar. Skilmerkilega skal greina hvert ágreiningsefnið er, hver er krafa aðila og rökstuðning fyrir henni. Ekki er skylt að nota eyðublaðið.

Fylgigögn

Æskilegt er að þau gögn fylgi með sem geta haft áhrif á úrlausn máls.

Kærunefnd jafnréttismála getur krafist frekari gagna frá málsaðilum telji hún málið ekki nægjanlega upplýst.

Aðsetur nefndarinnar er hjá

Úrskurðarnefnd velferðarmála
Katrínartún 2
105 Reykjavík
Netfang: [email protected]
Sími 551 8200 

Birting úrskurða

Úrskurðir nefndarinnar, áður álit, eru birtir á úrskurðavef Stjórnarráðsins.

Skipan nefndarinnar

Samkvæmt lögum um jafna stöðu og jafnan rétt kvenna og karla skipar ráðherra samkvæmt tilnefningu Hæstaréttar þrjá fulltrúa í kærunefnd jafnréttismála til þriggja ára í senn. Þeir skulu allir vera lögfræðingar og a.m.k. einn þeirra hafa sérþekkingu á jafnréttismálum. Formaður og varaformaður skulu uppfylla skilyrði um embættisgengi héraðsdómara. Varamenn eru skipaðir með sama hætti.

Aðalmenn

  • Arnaldur Hjartarson, héraðsdómari, formaður
  • Björn L. Bergsson, skrifstofustjóri, varaformaður
  • Þórey S. Þórðardóttir, hæstaréttarlögmaður

Varamenn

  • Grímur Sigurðsson, hæstaréttarlögmaður
  • Guðrún Björg Birgisdóttir, hæstaréttarlögmaður
  • Arnar Þór Jónsson, héraðsdómari 

Starfsmaður nefndarinnar er Unnur Björg Ómarsdóttir

 

 

Úrskurða- og kærunefndir
Til baka
Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira