Skýrsla verkefnisstjórnar loftslagsaðgerða 2025
Skýrsla verkefnisstjórnar loftslagsaðgerða hefur verið gerð aðgengileg á vef Stjórnarráðsins. Í skýrslunni er farið yfir stöðu loftslagsaðgerða og þróun losunar til ársins 2023, ásamt síðustu framreikningum sem skilað var til Evrópusambandsins byggt á aðgerðum sem voru skráðar í framkvæmd vorið 2025. Jafnframt er fjallað um nýsamþykktar loftlagsaðgerðir fyrir tímabilið 2025-2026 og mat á áhrifum þeirra.
Umsýsla loftslagsmála á landsvísu í þeim ríkjum sem Ísland ber sig saman við hefur þroskast mikið frá því að aðgerðaáætlun íslenskra stjórnvalda var fyrst gefin út og vekur verkefnisstjórnin í skýrslu sinni athygli á mikilvægi þess að ítarleg kostnaðar- og ábatagreining verði framkvæmd fyrir allar aðgerðir, svo forgangsraða megi aðgerðum betur. Einnig þurfi að taka tillit til mögulegra jákvæðra og neikvæðra áhrifa loftslagsaðgerða á samdrátt eða aukningu í útgjöldum hins opinbera á öðrum sviðum, s.s. vegna bættrar lýðheilsu eða hnignunar líffræðilegrar fjölbreytni og eins sé mikilvægt að móta og meta aðgerðir með tilliti til réttlátra umskipta.
Skýrsla verkefnisstjórnar loftslagsaðgerða 2025