2. Heildstætt mat á kostnaði vegna kynferðislegs ofbeldis gegn börnum og ungmennum
Unnið verði heildstætt mat á beinum og óbeinum samfélagslegum, hagrænum og efnahagslegum kostnaði vegna kynferðislegs ofbeldis gegn börnum og ungmennum á Íslandi. Lagt verði mat á heildarkostnað vegna áhrifa á heilbrigðiskerfi, félagsþjónustu og menntakerfi, auk kostnaðar vegna áhrifa á lífsgæði, atvinnuþátttöku og framleiðni í samfélaginu. Niðurstöður verði greindar eftir kyni og nýtist við stefnumótun, forgangsröðun verkefna og úrræða og eflingu forvarna.
Markmið: Draga fram skýra mynd af raunkostnaði samfélagsins vegna kynferðislegs ofbeldis gegn börnum og ungmennum á Íslandi.
Mælikvarði: Skýrsla með niðurstöðum úr mati á samfélagslegum, hagrænum og efnahagslegum kostnaði kynferðislegs ofbeldis gegn börnum og ungmennum liggi fyrir eigi síðar en í lok árs 2029.
Kostnaðaráætlun: 5 millj. kr.
Ábyrgðaraðili: Dómsmálaráðuneyti.
Tímarammi: 2026–2029.