Mannanafnanefnd, úrskurðir 30. apríl 2009
FUNDARGERÐ
Ár 2009, fimmtudaginn 30. apríl, var haldinn símafundur í mannanafnanefnd. Viðstödd voru Kolbrún Linda Ísleifsdóttir, Ágústa Þorbergsdóttir og Veturliði G. Óskarsson. Neðangreind mál voru tekin fyrir:
1. Mál nr. 29/2009 Eiginnafn: Gael (kk.)
Kveðinn er upp svohljóðandi úrskurður:
Mál þetta, sem móttekið var 6. apríl 2009, var tekið fyrir á fundum mannanafnanefndar 8. og 14. apríl sl. en afgreiðslu þess þá frestað til frekari skoðunar og gagnaöflunar.
Eiginnafnið Gael (kk.) tekur beygingu í eignarfalli, Gaels, og telst að öðru leyti uppfylla ákvæði 5. gr. laga nr. 45/1996 um mannanöfn.
Mannanafnanefnd telur rétt að benda umsækjendum á að kyn eiginnafnsins Gael er óljóst þar sem nafnið finnst bæði sem kvenmannsnafn og sem karlmannsnafn í erlendum gagnasöfnum og er þar mun algengara sem kven-mannsnafn. Einnig skal bent á að á mannanafnaskrá er aðeins eitt eiginnafn sem endar á –gael og er það kven-mannsnafnið Abigael.
Mannanafnanefnd telur þó ekki rétt að hafna nafninu formlega á þeim forsendum heldur treystir hún dómgreind forráðamanna barnsins til að velja því nafn sem það getur borið kinnroðalaust og án vandkvæða. Þetta er gert í anda laga nr. 45/1996 um mannanöfn og með vísun til athugasemda með lagafrumvarpinu á sínum tíma, sem einkennist af fullu trausti á smekkvísi og dómgreind almennings.
Úrskurðarorð:
Beiðni um eiginnafnið Gael (kk.) er samþykkt og skal nafnið fært á mannanafnaskrá ásamt eignarfallsendingu þess, Gaels, en þó ekki fyrr en skráning þess hefur verið framkvæmd hjá Þjóðskrá.
2. Mál nr. 33/2009 Eiginnafn: Reyn (kvk.)
Kveðinn er upp svohljóðandi úrskurður:
Eiginnafnið Reyn (kvk.) tekur beygingu í eignarfalli, Reynar, og telst að öðru leyti uppfylla ákvæði 5. gr. laga nr. 45/1996 um mannanöfn.
Úrskurðarorð:
Beiðni um eiginnafnið Reyn (kvk.) er samþykkt og skal nafnið fært á mannanafnaskrá ásamt eignarfallsendingu þess, Reynar.
- - - - - - - - - - - - - - - - - - - - - - - - - - - - - - - - - - -
Fleira var ekki tekið fyrir og fundi slitið.