Velferðarráðuneytið

Tillaga um móttöku flóttafólks samþykkt

Mynd frá flóttamannabúðum í Al Waleed árið 2008
Mynd frá flóttamannabúðum í Al Waleed árið 2008

Ríkisstjórnin samþykkti á fundi sínum í dag tillögu félags- og húsnæðismálaráðherra og utanríkisráðherra um móttöku flóttafólks árin 2013 og 2014. Niðurstaðan er í samræmi við tillögu flóttamannanefndar og miðast við að tekið verði á móti konum í hættu frá Afganistan og hinsegin fólki frá Íran eða Afganistan, samtals 10–14 einstaklingum í tveimur hópum. 

Íslensk stjórnvöld hafa í samstarfi við Flóttamannastofnun Sameinuðu þjóðanna tekið reglulega á móti flóttafólki frá árinu 1996. Flóttamannanefnd kynnti fyrir skömmu þær áherslur sem hún telur að leggja beri til grundvallar við móttöku flóttafólks og lagði tillögu sína fyrir félags- og húsnæðismálaráðherra og utanríkisráðherra. Þar er rakið hvernig íslensk stjórnvöld hafa undanfarið horft sérstaklega til kvenna í neyð við móttöku flóttafólks með áherslu á einstæðar mæður og jafnframt gerð grein fyrir því að hinsegin fólk sé jafnframt afar viðkvæmur hópur flóttafólks sem sæti ofsóknum og mannréttindabrotum í heimalöndum sínum. Er niðurstaða flóttamannanefndar sú að hér á landi séu góðir innviðir til að taka á móti einstæðum mæðrum og ástæða til að halda því áfram. Jafnframt telji nefndin réttindi hinsegin fólks vel varin hér á landi og íslensk stjórnvöld geti því lagt lóð sín á vogarskálarnar með því að taka á móti hinsegin flóttafólki.

Í kjölfar ákvörðunar ríkisstjórnarinnar í dag munu flóttamannanefnd og Útlendingastofnun vinna að framkvæmd málsins en Flóttamannastofnun Sameinuðu Þjóðanna veitir aðstoð við val þeirra flóttamanna sem boðið verður til Íslands.

Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn