Hoppa yfir valmynd
19. nóvember 2013 Utanríkisráðuneytið

Ísland í efsta sæti varðandi stöðu kvenna í umhverfismálum

Ísland er í fyrsta sæti af 72 ríkjum skv. svokallaðri umhverfis- og kynjavísitölu (Environment and Gender Index) sem kynnt var á 19. aðildaríkjaþingi loftslagssamnings Sameinuðu þjóðanna í Varsjá í dag. Með vísitölunni er lagt mat á frammistöðu ríkja varðandi stöðu kvenna og kynjasamþættingu í stefnumótun í umhverfismálum. Holland er í öðru sæti listans og Noregur í því þriðja en Kongó í því neðsta.

Þetta er í fyrsta sinn sem listinn er gefinn út en að baki honum er Alþjóðanáttúruverndarsambandið (IUCN - International Union for Conservation of Nature and Natural Resources). 

Samkvæmt listanum skorar Ísland hæst í flestum flokkum sem vísitalan nær til. Þó sé frammistaða landsins slakari þegar kemur að fjölda kvenna í samninganefndum um umhverfismál, fjölda kvenna í stjórnendastöðum sem og í æðstu stöðum hins opinbera. Þá þurfi ríkið að bæta sig í upplýsingagjöf til Samningsins um líffræðilega fjölbreytni (CBD) og Samningsins um afnám allrar mismununar gagnvart konum (CEDAW).

Almennt sýna niðurstöður IUCN að töluvert skorti á að upplýsingum um hlutverk og stöðu kvenna í umhverfismálum sé haldið til haga. Að mati sambandsins vantar þar með verulega upp á þekkingu á því hvernig mannkynið er háð náttúruauðlindum því upplýsingar um hvernig þær snerta konur eru varla til.

Þá hafa fæst ríki innleitt áætlanir um hvernig þau hyggjast framfylgja alþjóðlegum skuldbindingum á sviði samþættingar jafnréttis- og umhverfismála. Á hinn bóginn kemur fram að hlutfall kvenna í alþjóðlegum samninganefndum um loftslagsmál, líffræðilega fjölbreytni og eyðimerkurmyndun hefur aldrei verið hærra, eða 36 prósent.

Ísland hefur sett kynjasjónarmið á oddinn í alþjóðlegu loftslagsviðræðunum undanfarin ár í ljósi þess að áhrif loftslagsbreytinga séu meiri á konur en karla, ekki síst í fátækari ríkjum heims. Ekki síður leggur Ísland áherslu á forystu og þátttöku kvenna í loftslagsmálum, þar sem hún sé nauðsynleg forsenda þess að mannkyn geti tekist á við loftslagsbreytingar.

Fréttatilkynning IUCN

Umhverfis- og kynjavísitala IUCN – samantekt

Skýrsla IUCN

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira