Ár tækifæranna

Um áramót er alltaf hollt að líta yfir farinn veg um leið og framtíðarverkefnin eru kortlögð. Árið 2013 hefur sannarlega verið viðburðaríkt fyrir okkur sem störfum á vettvangi stjórnmálanna og verkefnalistinn fyrir komandi ár er langur og fjölbreyttur. Á þeim mánuðum sem liðnir eru frá því að ný ríkisstjórn tók við hefur fjölmörgum verkefnum verið hleypt af stokkunum og undirbúningur hafinn að breytingum á ýmsum sviðum. Stærstu mál ársins eru án efa afgreiðsla hallalausra fjárlaga þar sem forgangsraðað var í þágu grunnþjónustunnar og velferðarmála. Snúið var af braut skattahækkana fyrri ríkisstjórnar og mikilvæg upphafsskref stigin í lækkun skatta á almenning í landinu. Til viðbótar ber auðvitað að nefna þær viðamiklu tillögur sem kynntar hafa verið til leiðréttingar á skuldavanda heimilanna.

Í þeim málaflokkum sem ég sem iðnaðar- og viðskiptaráðherra ber ábyrgð á hefur ýmislegt verið að gerast. Þeir málaflokkar snúa að málefnum iðnaðar í landinu, orkumálum, nýsköpun, ferðamálum, umhverfi erlendra fjárfestinga og ívilnana, verslunar og þjónustu, samkeppnismála og starfsumhverfi viðskiptalífsins almennt.

Frá fyrsta degi höfum við unnið að einföldun regluverks atvinnulífsins og munum halda því áfram á næstu mánuðum. Hér þarf ýmislegt að laga, þó margt sé vissulega í góðu lagi. Má þar m.a. nefna ferlið sem þarf að fara í gegnum til að afla sér leyfa til reksturs sem í dag er oft óþarflega flókið. Í samtölum mínum við fulltrúa fjölmargra íslenskra fyrirtækja hef ég spurt um hindranir sem fólk rekur sig á og hvað gera megi betur. Svörin eru flest á sömu lund og við erum æ betur að sjá hvar úrlausna er þörf.

Unnið hefur verið að gerð fjárfestingasamninga sem í framtíðinni geta skapað mörg hundruð störf hér á landi auk mikilvægra gjaldeyristekna. Einn samningur hefur verið undirritaður og fleiri eru í burðarliðnum. Lög um ívilnanir vegna nýfjárfestinga hafa verið í endurskoðun á haustmánuðum og verður frumvarp til nýrra laga lagt fram á vorþingi. Mikilvægt er að efla fjárfestingar hér á landi sem hafa ekki verið minni í áratugi og tryggja það að lagaumhverfið hér sé samkeppnishæft við það sem annars staðar gerist.

Á síðustu mánuðum hefur verið unnið að undirbúningi náttúrupassa eða ferðakorts sem ætlunin er að lögleiða á árinu 2014. Leitast hefur verið við að hafa góða samvinnu við aðila úr greininni og aðra hagsmunaaðila og miðar vinnunni vel áfram. Ört vaxandi fjölda ferðamanna fylgja miklar tekjur í þjóðarbúið en einnig ýmsar áskoranir. Mikilvægt er að vernda þá „vöru“ sem ferðamennirnir sækja hingað til að njóta sem er íslenska náttúran, við þurfum að byggja upp fleiri staði til þess að dreifa álaginu og síðast en ekki síst þurfum við að tryggja öryggi ferðamannanna.

Það hefur verið virkilega ánægjulegt að fylgjast með gróskunni í íslenskri nýsköpun og þar felast gríðarlegri vaxtarmöguleikar. Þar horfi ég á bjarta tíma framundan. Einnig má nefna að ný hönnunarstefna er nú á lokametrunum sem og ný atvinnu- og nýsköpunarstefna sem lögð verður fyrir Alþingi í formi þingsályktunar á vorþingi.

Þriðja olíuleitarleyfið var gefið út í haust á Drekasvæðinu og vonandi styttist í að starfsemi hefjist á svæðinu með góðum árangri því olíuvinnsla væri sannarlega jákvæð viðbót við auðlindanýtingu Íslendinga.

Þessi upptalning er hvergi nærri tæmandi og fjölmörg önnur verkefni bíða úrlausnar. Ég finn almennt fyrir bjartsýni í íslensku atvinnulífi. Á síðustu mánuðum hafa fjölmargir aðilar komið til fundar við mig til að ræða uppbyggingu atvinnulífsins af öllu tagi. Umfjöllun um álver í Helguvík hefur verið áberandi og á það stundum til að yfirskyggja annað, en því fer fjarri að það sé eina framkvæmdin sem er í burðarliðnum. Vonandi fer þó að sjá til lands í því verkefni því núverandi staða óvissu og stöðnunar er verst. Fjárfestingasamningur um kísilver á Bakka er til meðferðar hjá ESA og ætti niðurstaða að fást í þau mál á næstunni. Þá getur uppbyggingin á Bakka hafist.

Hér hefur orðið stefnubreyting með nýrri ríkisstjórn, jákvæð stefnubreyting gagnvart atvinnuuppbyggingu í landinu. Hér hefur tekið við ríkisstjórn sem vill skapa starfsumhverfi sem ýtir undir fjárfestingu og vöxt í atvinnulífinu. Ríkisstjórn sem lítur svo á að skattahækkanir og auknar álögur dragi úr vaxtarmöguleikum en ekki öfugt og ríkisstjórn sem vill frelsi fremur en bönn. Hér er komin ríkisstjórn sem sér framundan ærin verkefni til uppbyggingar atvinnulífs eftir stöðnun síðustu ár. Oft var þörf – en nú er nauðsyn. Ég trúi því að nýtt ár 2014 sé ár mikilla tækifæra – það er okkar að sjá til þess að þau tækifæri verði nýtt.

Ragnheiður Elín Árnadóttir iðnaðar- og viðskiptaráðherra.