Tveggja milljarða króna erlend fjárfesting í örþörungaverksmiðju mun skapa 30 ný störf á Suðurnesjum 

Ragnheiður Elín Árnadóttir iðnaðar- og viðskiptaráðherra og forsvarsmenn líftæknifyrirtækisins Algalíf Iceland ehf. skrifuðu í dag undir fjárfestingasamning vegna örþörungaverksmiðju á Ásbrú á Reykjanesi. Áætlað er að verkefnið muni kosta um tvo milljarða króna og gera áætlanir ráð fyrir að framkvæmdum verði lokið um mitt ár 2015. Framleiðslan hefst strax á þessu ári en fullum afköstum verður náð á árinu 2016 og verða starfsmenn þá um 30 talsins. Nú þegar starfa átta manns hjá fyrirtækinu og mun þeim fjölga strax í næsta mánuði. 

Fjárfestingarsamningurinn við Algalíf er gerður með þeim fyrirvara að hann kemur ekki til framkvæmda fyrr en fullnægjandi lagastoðar hefur verið aflað frá Alþingi. Algalíf Iceland ehf. var stofnað í ágúst 2012 og er í eigu norska félagsins NutraQ A/S.

Algalíf nýtir 1.500m² húsnæði sem þegar er til á Ásbrú, fyrrum varnarsvæðinu við Keflavíkurflugvöll, en mun að auki byggja nýtt 6.000m² húsnæði. 

Í verksmiðjunni verða ræktaðir örþörungar sem nefnast Haematococcus Pluvialis, en úr þeim er unnið virka efnið Astaxanthin. Það er sterkt andoxunarefni sem notað er í fæðubótaefni og vítamínblöndur, auk þess að vera neytt sérstaklega í hylkjaformi. Mikill og vaxandi markaður er fyrir efnið og annar heimsframleiðslan hvergi nærri eftirspurn.

Skilyrði eru sérstaklega hagstæð á Íslandi til hátækniframleiðslu af þessu tagi, en nálægð við alþjóðaflugvöll, hreint vatn, örugg orkuafhending og hæft starfsfólk eru á meðal þeirra þátta sem réðu því að verksmiðjunni var valinn staður á Suðurnesjum.

Verksmiðjan verður sú fullkomnasta sinnar gerðar í heiminum. Þörungarnir verða ræktaðir í lokuðu kerfi þar sem næringu, hita og birtumagni verður stýrt nákvæmlega.klega hagstæð á Íslandi til hátækniframleiðslu af þessu tagi, en nálægð við alþjóðaflugvöll, hreint vatn, örugg orkuafhending og hæft starfsfólk eru á meðal þeirra þátta sem réðu því að verksmiðjunni var valinn staður á Suðurnesjum.

Verksmiðja Algalífs mun nota 5 megavött af raforku til framleiðslunnar. Þegar hefur verið gengið frá orkusamningi við HS orku um raforkukaup til 25 ára.

Framkvæmdastjóri Algalífs á Íslandi er Skarphéðinn Orri Björnsson. Hann hefur um árabil unnið í lyfjageiranum, meðal annars hjá Actavis og einnig sem sérfræðingur og framkvæmdastjóri hjá Sameinuðu þjóðunum vegna uppbyggingar á nútíma lyfjaverksmiðjum í Afríku.