Hoppa yfir valmynd
7. desember 2016 Dómsmálaráðuneytið

Þinglýsingatími verði styttur í tvo til þrjá virka daga

Embætti sýslumannsins á höfuðborgarsvæðinu vinnur nú að því að stytta afgreiðslutíma þinglýstra skjala hjá embættinu niður í tvo til þrjá virka daga en hann hefur undanfarið verið allt að 12 virkir dagar. Embættið fékk ráðgjafa til að fara yfir verklag og innanríkisráðuneytið hefur samþykkt að veita embættinu viðbótarfjárveitingu til að ná þessu markmiði.

Í verkföllum BHM og SFR á síðasta ári söfnuðust upp skjöl til þinglýsingar og í kjölfar þess lengdist biðtími eftir þinglýstum skjölum umtalsvert. Til að ráða bót á þessu fékk sýslumaðurinn á höfuðborgarsvæðinu ráðgjafa frá KPMG til liðs við þinglýsingasvið embættisins til að greina stöðuna, fara yfir verklagið og leggja til úrbætur í samvinnu við starfsmenn þinglýsingasviðs. Markmið sýslumannsins á höfuðborgarsvæðinu er að þinglýsingar verði jafnan afgreiddar á tveimur til þremur virkum dögum. Í kjölfar þessa verkefnis og með samlegðaráhrifum við flutning embættisins í nýtt húsnæði hefur verklag verið endurbætt og afköst hafa aukist. Þegar hefur náðst sá árangur að afgreiðsla þinglýsinga hefur styst úr 12 virkum dögum í 9.

Með þriggja milljóna króna viðbótarfjárveitingu frá innanríkisráðuneytinu hefur embættið m.a. ráðið lögfræðing með reynslu af þinglýsingum til starfa tímabundið. Er þess vænst að þessar aðgerðir allar stytti þinglýsingartímann niður í tvo til þrjá virka daga og að því markmiði verði náð sem fyrst á nýju ári.

Afgreiðsla sýslumannsins á höfuðborgarsvæðinu er nú að Hlíðasmára 1 í Kópavogi og hefur skrifstofum embættisins við Dalveg og Bæjarhraun verið lokað. Skrifstofunni við Skógarhlíð verður lokað á næstu dögum þegar Fjölskyldusvið, sem hefur með höndum fjölskyldumálefni, dánarbú, sifjamál, lögráðamál og sáttameðferð, flytur í Hlíðasmára 1.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira