Fyrsta úthlutun úr hljóðritasjóði

Mennta- og menningarmálaráðherra hefur samþykkt tillögu stjórnar hljóðritasjóðs að veita 84 styrki í ár

Hljóðritasjóður var settur á stofn af mennta- og menningarmálaráðuneyti 1. apríl sl. og var Rannís falið að hafa umsjón með honum. Sjóðurinn hafði til ráðstöfunar 33,5 millj. kr. á yfirstandandi ári og var því fé öllu úthlutað núna. Umsóknarfrestur rann út 10. október sl. Sjóðnum bárust 167 styrkumsóknir og sótt var um ríflega 165 millj. kr. Umsóknarupphæð var að meðaltali nærri einni milljón króna.

Tónlistarstílar verkefna flokkast þannig:

• Umsóknir fyrir rokk, þungt og indie rokk voru 24 talsins eða um 14% umsókna, af þeim hlutu átta styrk, samtals að upphæð 3,3 millj. kr.

• Umsóknir fyrir popp, indie popp, dægurtónlist, raftónlist, þjóðlagatónlist, barnatónlist, hip-hop o.fl. voru 78 talsins eða tæplega helmingur umsókna. Af þeim hlutu 45 styrk að fjárhæð ríflega 18 millj. kr.

• Undir nútímatónlist, samtímatónlist, kóratónlist, sönglög o.fl. mætti flokka 31 umsókn eða 18% umsókna. Af þeim hlutu 18 styrki, samtals að fjárhæð um 6 millj. kr.

• Jazztónlist af ýmsum toga átti við um 19 umsóknir en af þeim hlutu 12 styrk að fjárhæð 5,5 millj. kr.

• Þrjár umsóknir bárust þar sem viðfangsefnið var illskilgreinanlegt og hlaut ein þeirra 200.000 kr. styrk.

Kynjahlutfall forsvarsmanna umsækjenda og svo þeirra sem hlutu á endanum styrki reyndist það sama, þ.e. 61% umsækjenda karlar og 31% umsækjenda konur og 8% blandaðir hópar.

Það var mat stjórnar að langflestar umsóknanna hafi verið vel unnar og verkefnin nær öll mjög verðug. Verkefni stjórnar var því afar erfitt og eftir sitja mörg góð og áhugaverð hljóðritunarverkefni sem ekki hljóta styrki að þessu sinni.

Úthlutun 2016