Þórdís Kolbrún Gylfadóttir er nýr ferðamála-, iðnaðar- og nýsköpunarráðherra
Þórdís Kolbrún Reykfjörð Gylfadóttir tók í dag við embætti ferðamála-, iðnaðar- og nýsköpunarráðherra af Ragnheiði Elínu Árnadóttur sem óskaði henni velfarnaðar í starfi þar sem biðu hennar ótal spennandi verkefni.
Þórdís Kolbrún er annar tveggja ráðherra í atvinnuvega- og nýsköpunarráðuneytinu – hinn er Þorgerður Katrín Gunnarsdóttir sjávarútvegs- og landbúnaðarráðherra.
Þórdís Kolbrún er með lögfræðipróf frá Háskólanum í Reykjavík og starfaði sem lögfræðingur hjá úrskurðarnefnd umhverfis- og auðlindamála 2011–2012.
Þórdís Kolbrún var framkvæmdastjóri þingflokks Sjálfstæðisflokksins 2013–2014. Hún var stundakennari í stjórnskipunarrétti við Háskólann í Reykjavík 2013–2015.
Þórdís Kolbrún var aðstoðarmaður Ólafar Nordal innanríkisráðherra 2014–2016.
Hún var kosin á Alþingi í október fyrir Sjálfstæðisflokkinn í Norðvesturkjördæmi.