Heilbrigðisráðherra á þingi WHO í Genf
Óttarr Proppé heilbrigðisráðherra ávarpaði í gær 70. þing Alþjóðaheilbrigðismálastofnunarinnar (WHO) í Genf. Hann ræddi um áherslur íslenskra stjórnvalda í heilbrigðismálum, um eflingu heilsugæslu og geðheilbrigðisþjónustu og markmiðið um „heilsu í allar stefnur.“
Ráðherra hóf mál sitt með því að lýsa samhug og votta samúð þeim sem eiga um sárt að binda vegna hryðjuverkaárásanna í Manchester.
Í upphafi ræðu sinnar vísaði ráðherra til markmiða Sameinuðu þjóðanna um sjálfbæra þróun á sviði heilbrigðismála og hvernig þau byggjast á samvinnu þvert á stjórnsýslustig og þvert á málaflokka. Hann sagði þessa nálgun mikilvæga og fela í sér hvatningu og tækifæri til að vinna að heilsueflingu og vellíðan í samfélaginu. Í þeim anda legðu íslensk stjórnvöld meðal annars áherslu á að efla lýðheilsu og heilsueflingu með því að skapa aðstæður sem ýta undir heilbrigðan lífsstíl eins og unnið sé að með verkefninu Heilsueflandi samfélag.
Í lok ræðu sinnar færði ráðherra Dr. Chan, fráfarandi framkvæmdastjóra WHO, þakkir fyrir störf hennar og óskað jafnframt nýjum framkvæmdastjóra, Eþíópíumanninum Dr. Tedros Adhanom Ghebreyesus til hamingju með kjör hans í embættið sem hann tekur formlega við 1. júlí næstkomandi.