Forsætisráðuneytið

Þjóðaröryggisráð fundaði í dag í þriðja sinn

Á fundi þjóðaröryggisráðs í dag voru kynnt og rædd málefni er varða þjóðaröryggi sem eru efst á baugi á þeim sviðum sem þjóðaröryggisstefnan tekur til.

Ráðið samþykkti skýrslu til Alþingis um framkvæmd þjóðaröryggisstefnu fyrir Ísland.

Þá samþykkti þjóðaröryggisráð að hefja undirbúning að því að ráðið leggi mat á ástand og horfur í öryggis- og varnarmálum og að slíkt mat komi út í árslok. Ráðið samþykkti einnig að hefja undirbúning að mótun þjóðaröryggisvísa í samvinnu við Hagstofu Íslands o.fl. Stefnt er að því að fram fari æfing á neyðarfundi ráðsins í tilefni af atburðum sem hafa orðið eða eru yfirvofandi, sem ætla má að hafi áhrif á þjóðaröryggi. Þá hafa verið lögð drög að opnu málþingi um þjóðaröryggismál síðar á árinu í tengslum við fullveldisafmælið og gert er ráð fyrir að haldið verði málþing í upphafi næsta árs um fjölþáttaógnir (e.hybrid threats).

Sérstök umræðuefni á fundinum voru núverandi hernaðarlegt ógnarmat á Norðurlöndum í heild og hugsanleg áhrif þess á stöðu og ógnarmat Íslands. Jafnframt var fjallað um stöðu Íslands í alþjóðasamstarfi um landamæraeftirlit eftir úttektarskýrslu Schengen.

Þjóðaröryggisráð er samráðsvettvangur um þjóðaröryggismál og hefur eftirlit með að framkvæmd þjóðaröryggisstefnu fyrir Ísland sé í samræmi við samþykkt Alþingis. Þjóðaröryggisráði er ætlað að leggja mat á ástand og horfur í öryggis- og varnarmálum og beita sér fyrir opinni og lýðræðislegri umræðu um þjóðaröryggismál og eflingu fræðslu og upplýsingagjöf um þau mál.

Í þjóðaröryggisráði eiga fast sæti forsætisráðherra, sem er formaður ráðsins, utanríkisráðherra, dómsmálaráðherra og ráðuneytisstjórar viðkomandi ráðuneyta. Enn fremur eiga sæti í ráðinu tveir alþingismenn, annar úr þingflokki sem skipar meiri hluta á Alþingi en hinn úr þingflokki minni hluta. Þá sitja í ráðinu forstjóri Landhelgisgæslunnar, ríkislögreglustjóri og fulltrúi Slysavarnafélagsins Landsbjargar. Núverandi skipan þjóðaröryggisráðs er þessi:

  • Katrín Jakobsdóttir, forsætisráðherra, formaður
  • Sigríður Á. Andersen, dómsmálaráðherra
  • Guðlaugur Þ. Þórðarson, utanríkisráðherra
  • Ragnhildur Arnljótsdóttir, ráðuneytisstjóri forsætisráðuneytis
  • Haukur Guðmundsson, ráðuneytisstjóri dómsmálaráðuneytis
  • Sturla Sigurjónsson, ráðuneytisstjóri utanríkisráðuneytis.
  • Haraldur Johannessen, ríkislögreglustjóri
  • Georg Lárusson forstjóri Landhelgisgæslu Íslands
  • Smári Sigurðsson, fulltrúi Slysavarnafélagsins Landsbjargar
  • Oddný Harðardóttir, alþingismaður
  • Silja Dögg Gunnarsdóttir, alþingismaður.
Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn