Velferðarráðuneytið

Samið um byggingu nýs hjúkrunarheimilis í Hornafirði

Svandís Svavarsdóttir og Björn Ingi Jónsson - myndVelferðarráðuneytið

Nýtt hjúkrunarheimili með rýmum fyrir 30 íbúa verður byggt á Höfn í Hornafirði. Svandís Svavarsdóttir heilbrigðisráðherra og Björn Ingi Jónsson, bæjarstjóri, undirrituðu samning þessa efnis í velferðarráðuneytinu í dag.

Á Höfn í Hornafirði eru núna 24 hjúkrunarrými á heimilinu Skjólgarði. Húsnæði Skjólgarðs uppfyllir ekki lengur kröfur sem gerðar eru til húsnæðis og aðbúnaðar á hjúkrunarheimilum í dag.

Nýja hjúkunarheimilið verður reist á lóð Heilbrigðisstofnunar Suðurlands, Víkurbraut 31. Velferðarráðuneytið og sveitarfélagið Hornafjörður munu standa saman að byggingu hússins og breytingu sem gerð verður á hluta eldra húsnæðis í tengslum við framkvæmdina.

Aðdragandi þessa samkomulags hefur verið nokkuð langur og ánægjan því mikil að þessum áfanga skuli nú náð. Á fyrri stigum var gert ráð fyrir að rýmin yrði 24, en nú er niðurstaðan sú að rýmin verða 30 og er það í samræmi við mat ráðuneytisins á þörf fyrir fjölda hjúkrunarrýma á svæðinu á næstu árum.

Áætlað er að framkvæmdir hefjist síðla næsta árs og að heimilið verði tekið í notkun árið 2021.

Áætlaður kostnaður nemur um einum milljarði króna og skiptist þannig að ríkissjóður fjármagnar 85% framkvæmdanna á móti 15% sveitarfélagsins.

Frá vinstri: Sveinn Bragason, Bryndís Þorvaldsdóttir, Sæmundur Helgason, Ásgerður K. Gylfadóttir, Matthildur Ásmundardóttir, Svandís Svavarsdóttir, Björn Ingi Jónsson og Lovísa Rósa Bjarnadóttir

Frá vinstri: Sveinn Bragason, Bryndís Þorvaldsdóttir, Sæmundur Helgason, Ásgerður K. Gylfadóttir, Matthildur Ásmundardóttir, Svandís Svavarsdóttir, Björn Ingi Jónsson og Lovísa Rósa Bjarnadóttir

Efnisorð

Hafa samband

Ábending / fyrirspurn