Hoppa yfir valmynd
26. febrúar 2019 Umhverfis- og auðlindaráðuneytið

Endurnýjun samstarfssamnings um Landgræðsluskóga

Frá undirritun samningsins. - mynd
Umhverfis- og auðlindaráðuneytið, Skógræktarfélag Íslands, Landgræðslan og Skógræktin hafa endurnýjað samning um rekstur og framkvæmd Landgræðsluskóga til næstu fimm ára.

Landgræðsluskógar hafa verið starfræktir síðan árið 1990 og er því um að ræða endurnýjun samnings um verkefnið. Landgræðsluskógar byggja á starfi áhugamanna í skógræktarfélögum á Íslandi. Markmið Landgræðsluskóga er að græða lítt og ógróið land með fjölbreyttum skógum og stuðla þannig að ræktun skóga til útivistar fyrir almenning, endurheimt vistkerfa og eflingu líffræðilegrar fjölbreytni og framkvæmd stefnu íslenskra stjórnvalda í loftslagsmálum.

Samningurinn felur í sér ýmis ákvæði varðandi framkvæmd Landgræðsluskóga s.s. að Skógræktarfélag Íslands vinni áætlun sem að lágmarki skilgreinir markmið, tegundaval og afmörkun svæða til gróðursetningar. Skógræktarfélag Íslands tryggir að lagt sé mat á árangur gróðursetninga og að skráning aðgerða uppfylli kröfur til loftslagsbókhalds. Áætlanir og öll verkefni innan Landgræðsluskóga skulu samræmast opinberri stefnumörkun í skógrækt og landgræðslu, aðgerðaáætlun í loftslagsmálum, skipulagsáætlunum sveitarfélaga og ákvæðum náttúruverndarlaga og annarra laga sem við eiga.

Skógræktin og Landgræðslan veita eftir því sem þörf er á leiðbeiningar sem geta bætt og styrkt framkvæmd verkefnisins. Auk þess fara stofnanirnar með eftirlit með framkvæmd samningsins fyrir hönd umhverfis- og auðlindaráðuneytisins.


Efnisorð

Hafa samband

Ábending / fyrirspurn
Ruslvörn


Þessi síða notar vafrakökur Lesa meira