Mennta- og menningarmálaráðuneyti styrkir Myndlistaskólann í Reykjavík til þess að bjóða á ný uppá eins árs nám í myndlist fyrir nemendur með þroskahömlun. Verður námið í boði frá og með þessu hausti. Námskostur þessi er sniðinn að nemendum sem lokið hafa starfsbraut framhaldskóla eða sambærilegu námi. Skólinn bauð upp á námið á árunum 2015-2017 og naut það mikilla vinsælda. Þar er lögð áhersla á að nemendur kynnist fjölbreyttum vinnuaðferðum, tækni og hugtökum sem notuð eru um myndlist og hönnun og öðlist innsýn í listasögu og samtímalist. Rík áhersla er lögð á valdeflingu og að námið sé ánægjulegt fyrir nemendur.
Ákvörðun um að endurvekja námið er tekin að fenginni tillögu verkefnishóps um úrbætur er varðar menntun, atvinnu- og tómstundamöguleika nemenda sem lokið hafa námi á starfsbrautum framhaldsskóla sem ráðherra skipaði sl. vetur. Fleiri tillögur hópsins eru til skoðunar í ráðuneytinu.
