Hoppa yfir valmynd
26. nóvember 2019 Félagsmálaráðuneytið

Félags- og barnamálaráðherra undirritar samning við Grófina-geðverndarmiðstöð á Akureyri

Ásmundur Einar Daðason, félags- og barnamálaráðherra, og Valdís Eyja Pálsdóttir, forstöðumaður Grófarinnar handsöluðu samninginn um helgina. - mynd

Ásmundur Einar Daðason, félags- og barnamálaráðherra, og Valdís Eyja Pálsdóttir, forstöðumaður Grófarinnar - geðverndarmiðstöðvar á Akureyri undirrituðu í dag samning um tólf milljóna króna framlag til reksturs Grófarinnar. Samningurinn byggir á samþykkt fjárlaganefndar Alþingis og gildir til 31. desember 2020.

Meginmarkmið samningsins er að styrkja Grófina til að standa straum af kostnaði við starfsemina sem felst meðal annars í að skapa tækifæri fyrir þá sem glíma við geðraskanir til að vinna í sínum bata á eigin forsendum og á eigin ábyrgð í samræmi við hugmyndafræði valdeflingar. Eins að auka virkni fólks sem glímir við geðraskanir í daglegu lífi. Grófin stendur einnig fyrir hópstarfi og fræðslu fyrir notendur og aðstandendur auk þess að vinna að fræðslu og forvörnum í samfélaginu til að auka skilning og draga úr fordómum í garð þeirra sem glíma við geðraskanir.

Grófin hóf starfsemi á alþjóðlega geðheilbrigðisdaginn þann 10. október 2013 að frumkvæði Geðverndarfélags Akureyrar og nágrennis. Miðstöðin er staðsett í Hafnarstræti 95 á Akureyri. Grófin er ávöxtur grasrótarhóps notenda og fagfólks sem ákvað að byggja á tíu ára farsælu starfi Hugarafls í Reykjavík. Í upphafi var aðeins um sjálfboðastarf að ræða en með stuðningi opinberra aðila hefur tekist að byggja upp öfluga starfsemi.

„Það er afar mikilvægt að þjónusta sem þessi sé í boði á landsbyggðinni og að þeir sem á þurfa að halda þurfi ekki að leggjast í löng ferðalög til að sækja sér þjónustu við hæfi. Starfsemi Grófarinnar hefur gefið góða raun og er ánægjulegt að geta tryggt henni áframhaldandi brautargengi,“ sagði Ásmundur Einar við undirritunina.

 

 

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira