Hoppa yfir valmynd
14. janúar 2020

Gæðastjóri á rannsóknastofum Lífvísindaseturs

Gæðastjóri á rannsóknastofum Lífvísindaseturs Háskóla Íslands 

Laust er til umsóknar fullt starf gæðastjóra á rannsóknastofum Lífvísindaseturs Háskóla Íslands.

Gæðastjóri heyrir undir forstöðumann Lífvísindaseturs og er ætlað að hafa daglega umsjón með rekstri rannsóknastofa setursins á Vatnsmýrarvegi 16 og Sturlugötu 8. Starfið felst einkum í uppsetningu verkferla, s.s. við frumuvinnu, eftirfylgd með öryggisreglum, innkaupum á rekstararvöru, skipulagningu í sýnageymslum og öryggisvöktun tækja. Viðkomandi er einnig ætlað að sinna ýmsum sérverkefnum, svo sem skimun fyrir mengun í frumuræktun og móttöku og varðveislu sýna. 

Á rannsóknastofum Lífvísindaseturs starfar að jafnaði fjölþjóðlegur hópur sérfræðinga og meistara- og doktorsnema. 

Helstu verkefni og ábyrgð
- Umsjón með gæða- og öryggismálum á rannsóknastofum í samráði við Öryggisnefnd HÍ.
- Uppsetning verkferla og verklagsreglna.
- Utanumhald um innkaup á almennri rekstrarvöru.
- Gæðastjórnun vegna vinnu með lifandi frumur.
- Eftirfylgni með leyfum sem heyra undir Umhverfisstofnun.
- Umsjón með skipulagi í sýnageymslum.
- Öryggisvöktun á tækjabúnaði.
- Sérverkefni sem tengjast uppbyggingu á aðferðum.
- Starfsmaðurinn mun taka þátt í mótun starfsins og þróun verkefna. 

Hæfnikröfur
- Umsækjendur skulu hafa lokið grunnnámi í lífeindafræði, sameindalíffræði eða sambærilegri menntun. 
- Æskilegt er að viðkomandi hafi einnig lokið meistaraprófi sem nýtist í starfi eða búi yfir haldgóðri reynslu af vinnu á rannsóknastofu, og þá sér í lagi í tengslum við vinnu með lifandi frumur. 
- Góð færni í mannlegum samskiptum.
- Góð kunnátta í íslensku og ensku, bæði í ræðu og riti.
- Góð tölvukunnátta, auk færni á sviði upplýsingatækni og hæfni til að tileinka sér nýjungar á því sviði.
- Frumkvæði, sveigjanleiki og sjálfstæði í starfi.

Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.
Öllum umsóknum verður svarað og umsækjendum tilkynnt um ráðstöfun starfanna þegar ákvörðun hefur verið tekin. Umsóknir geta gilt í sex mánuði frá lokum umsóknarfrests. 

Við ráðningu í störf í Háskóla Íslands er tekið mið af jafnréttisáætlun skólans, sjá hér: http://www.hi.is/haskolinn/jafnrettisaaetlun#markmid2

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands

Lífvísindasetur Háskóla Íslands (http://lifvisindi.hi.is/) hefur heimilisfesti við Læknadeild og er samstarfsvettvangur rannsóknahópa í sameindalíffræði við Háskóla Íslands og samstarfsstofnana á Íslandi. Ein af megináherslum í starfsemi Lífvísindaseturs er uppbygging kjarnaeininga sem nýtast rannsóknahópunum sem best. Rannsóknir vísindamanna við Lífvísindasetrið eru fjölbreyttar og snúa meðal annars að ýmsum tegundum krabbameina, stofnfrumum, taugalíffræði, ónæmisfræði, örverufræði, þroskunarfræði og lífeðlisfræði. Hópstjórar sem tengjast setrinu eru um 70 og nemendur á meistara- og doktorsstigi auk nýdoktora eru vel á annað hundrað. 

Heilbrigðisvísindasvið er eitt af fimm fræðasviðum Háskóla Íslands. Innan sviðsins eru sex deildir; Hjúkrunarfræðideild, Lyfjafræðideild, Læknadeild, Matvæla- og næringarfræðideild, Sálfræðideild og Tannlæknadeild. Starfsmenn sviðsins eru um 300 og nemendur um 2200. 

Háskóli Íslands er stærsta kennslu-, rannsókna- og vísindastofnun Íslands og eini skólinn hérlendis sem er á báðum virtustu matslistunum yfir bestu háskóla heims, Times Higher Education World University Rankings og ShanghaiRanking.
 
Starfshlutfall er 100%
Umsóknarfrestur er til og með 24.01.2020

Nánari upplýsingar veitir
Sigríður Klara Böðvarsdóttir - [email protected] - 525 5852


Háskóli Íslands
Læknadeild
v/Vatnsmýrarveg
101 Reykjavík


Smelltu hér til að sækja um starfið
 

 

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira