Hoppa yfir valmynd
3. mars 2020 Heilbrigðisráðuneytið

Hjúkrunarheimili fyrir 99 manns við Sléttuveg tekið í notkun

Heilbrigðisráðherra við vígslu hjúkrunarheimilisins við Sléttuveg - myndMynd: Hrafnista

Stór áfangi í uppbyggingu hjúkrunarrýma á höfuðborgarsvæðinu var innsiglaður þegar nýtt hjúkrunarheimili fyrir 99 manns við Sléttuveg var vígt síðastliðinn föstudag að viðstöddu fjölmenni. Fyrstu íbúar heimilisins eru fluttir inn og er kappkostað að því að koma heimilinu í fullan rekstur sem fyrst.

Skrifað var undir samninga um byggingu heimilisins í október árið 2016. Heimilið er að 85% í eigu ríkisins á móti 15%  hlut Reykjavíkurborgar. Ákveðið var að fara nýja leið við framkvæmdirnar með því að gera um þær alhliða samning milli ríkis og borgar. Í því felst að Reykjavíkurborg hefur ábyrgst og stýrt hönnun, byggingu og rekstri hjúkrunarheimilisins en ríkið hefur greitt umsamið fermetraverð eftir því sem verkinu hefur undið fram. Þessi leið hefur gefist vel og hefur samningur um sama fyrirkomulag verið gerður við Reykjanesbæ vegna byggingar 60 rýma hjúkrunarheimilis á Nesvöllum sem undirritaður var í liðinni viku. Það er einnig nýlunda í framkvæmdaferlinu að Reykjavíkurborg og Hrafnista, sem mun annast rekstur heimilisins, höfðu með sér samvinnu í hönnunar- og byggingarferlinu. Þannig hefur rekstraraðilinn haft hönd í bagga varðandi útfærslur á aðbúnaði íbúa og vinnuaðstöðu starfsfólks.

Svandís Svavarsdóttir heilbrigðisráðherra sagði við vígsluathöfnina að opnun hjúkrunarheimilisins væri langþráð og kærkomin og búin að vera tilhlökkunarefni margra. „Varla hefur verið flutt sú frétt af þjónustu við aldraða síðustu mánuði, öðru vísi en vitnað sé til opnunar hjúkrunarheimilis við Sléttuveg. Og nú er komið að því.“ Svandís sagði nýja heimilið bera vitni um góða samvinnu allra sem hlut eiga að máli og sagðist jafnframt viss um að framundan væri farsælt starf á heimilinu við Sléttuveg: „Ég óska Reykjavíkurborg, Hrafnistu, nýjum íbúum og okkur öllum til hamingju með nýtt og glæsilegt hjúkrunarheimili.“

  • Hjúkrunarheimilið við Sléttuveg
  • Klippt á borða
  • Fjölmenni við vígslu hjúkrunarheimilisins

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Þessi síða notar vafrakökur Lesa meira