Hoppa yfir valmynd
18. desember 2020 Atvinnuvega- og nýsköpunarráðuneytið

120 m.kr. aukaframlag til loðnuleitar

Hafrannsóknastofnun mun fá 120 milljón króna aukaframlag samkvæmt breytingartillögum fyrir 3. umræðu fjárlaga næsta árs til rannsókna og leitar að loðnu. Kristján Þór Júlíusson, sjávarútvegs- og landbúnaðarráðherra, fundaði í gær með fulltrúum stofnunarinnar og Samtaka fyrirtækja í sjávarútvegi um fyrirkomulag loðnuleitar á næstu vikum og mánuðum. Samstaða er um að leitin verði eins umfangsmikil og þörf er á enda miklir hagsmunir í húfi.

Engar loðnuveiðar hafa verið stundaðar við Ísland síðustu tvær vertíðir með tilheyrandi tjóni. Eftir mælingar á ungloðnu haustið 2019 ríkti jákvæðni um að loðnuveiðar yrðu stundaðar á komandi vetri. Ráðlagður upphafskvóti var 170 þúsund tonn. Í kjölfar mælinga tveggja rannsóknaskipa í september 2020 var ráðgjöfin endurskoðuð en þá lagði Hafrannsóknastofnun til að engar veiðar yrðu stundaðar nema mælingar á stærð stofnsins í janúar og febrúar 2021 gæfu tilefni til. Byggði sú ráðgjöf á gildandi aflareglu Íslands, Grænlands og Noregs. Í fyrradag tilkynnti Hafrannsóknastofnun um ráðgjöf um aflamark upp á 21.800 tonn.

Ráðgert er að næsti loðnuleiðangur verði farinn í byrjun janúar.

Kristján Þór Júlíusson, sjávarútvegs- og landbúnaðarráðherra:

„Það skiptir miklu fyrir viðspyrnu efnahagslífsins að loðna veiðist í vetur en áætlað hefur verið að útflutningsverðmæti um 170 þúsund tonna af loðnu nemi um 25 milljörðum króna. Með auknu fjármagni til loðnuleitar á komandi vikum og mánuðum er verið að skapa meiri vissu um leitina og tryggja um leið að leitin verði eins umfangsmikil og þörf er á.“

 

Efnisorð

Heimsmarkmiðin

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira