Hoppa yfir valmynd
9. janúar 2021 Mennta- og menningarmálaráðuneytið

Góð reynsla komin á starf samskiptaráðgjafa

Sigurbjörg Sigurpálsdóttir samskiptaráðgjafi íþrótta- og æskulýðsstarfs. - mynd
Samskiptaráðgjafi í íþrótta- og æskulýðsmálum tók til starfa á síðasta ári og er komin góð reynsla á fyrirkomulag verkefna hans og ráðgjafar en fjölbreytt verkefni rata á hennar borð. Hlutverk samskiptaráðgjafans er meðal annars að leiðbeina einstaklingum sem til hans leita vegna atvika eða misgerða sem orðið hafa í skipulögðu íþrótta- og æskulýðsstarfi sem varða t.d. einelti, ofbeldi eða kynbundna eða kynferðislega áreitni. Þá veitir ráðgjafinn einnig íþrótta- og æskulýðsfélögum og -samtökum fræðslu um forvarnir á þessu sviði.

Starfinu gegnir nú Sigurbjörg Sigurpálsdóttir sem er klínískur sálfræðingur og starfar innan Domus Mentis geðheilsustöðvar .

Lilja Alfreðsdóttir mennta- og menningarmálaráðherra
„Markmið okkar er að allir geti stundað sín áhugamál í öruggu umhverfi. Ég fagna því hversu vel hefur gengið að koma þessu verkefni á legg frá því að ný lög voru sett í kjölfar #metoo-byltingarinnar, og að þjónustan sé nú komin í fulla virkni. Þessi ráðgjöf er mikilvæg, hún er hlutlaus því samskiptaráðgjafinn er óháður og svo er hún líka gjaldfrjáls og opin öllum sem hana þurfa.“

Sigurbjörg Sigurpálsdóttir samskiptaráðgjafi íþrótta- og æskulýðsstarfs:
„Hér er kominn öruggur vettvangur til þess að allir iðkendur, starfsmenn og sjálfboðaliðar; börn, unglingar og fullorðnir óháð kynferði eða stöðu, geta leitað sér aðstoðar eða réttar síns vegna atvika og misgerða sem eiga sér stað í íþrótta- eða æskulýðsstarfi án þess að þurfa að óttast afleiðingar. Öllum ábendingum sem varða einelti, áreitni og ofbeldi er tekið alvarlega og þær kannaðar, öll mál eru unnin eftir ákveðnu verklagi með trúnað og skilning að leiðarljósi. Auk þess getur samskiptaráðgjafi veitt félögum og samtökum leiðbeiningar varðandi slík mál og gerir tillögur til úrbóta þegar við á. Markmiðið er að auka öryggi og þar með ánægju í skipulögðu íþrótta- og æskulýðsstarfi. Einnig má ítreka að starf samskiptaráðgjafa er óháð íþrótta- og æskulýðsfélögum- og samtökum, stuðlar þannig að hlutleysi í meðferð mála og er vonandi hvatning til þess að leita þangað þegar þess þarf.“

Nánari upplýsingar um hlutverk samskiptaráðgjafans, feril mála og forvarnir er að finna á vefnum samskiptaradgjafi.is

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira