Hoppa yfir valmynd
11. mars 2021 Mennta- og barnamálaráðuneytið

Samræmdum könnunarprófum aflýst

Samræmdum könnunarprófum aflýst - myndMynd: Hari / Morgunblaðið
Lilja Alfreðsdóttir mennta- og menningarmálaráðherra hefur ákveðið að aflýsa hefðbundnum samræmdum prófum í ensku og stærðfræði, sem ráðgert var að leggja rafrænt fyrir nemendur í 9. bekk í næstu viku. Þessi ákvörðun byggir fyrst og fremst á hagsmunum nemenda og sjónarmiðum skólasamfélagsins.

Annmarkar voru á rafrænni fyrirlögn prófs í íslensku hinn 8. mars og var prófum í ensku og stærðfræði þá frestað um nokkra daga. Að vel athuguðu máli telur Menntamálastofnun ekki öruggt að rafræn fyrirlögn prófanna muni ganga snurðulaust fyrir sig, enda hafi þjónustuaðili prófakerfisins ekki brugðist við aðstæðum með fullnægjandi hætti.

Nemendum verður hins vegar gefið val um að taka könnunarpróf í viðkomandi greinum á tímabilinu 17. mars - 30. apríl nk. Menntamálastofnun ber að tryggja þá framkvæmd. Skipulag fyrirlagnarinnar skal undirbúin í samráði við skólasamfélagið og miðast við lágmarksröskun á skólastarfi.

Þá er Menntamálastofnun gert að tryggja skilvirka og skýra upplýsingamiðlun til skóla, nemenda og foreldra um þetta fyrirkomulag.

Lilja Alfreðsdóttir, mennta- og menningarmálaráðherra:
„Núverandi fyrirkomulag samræmdra prófa er komið á endastöð. Grundvallarbreyting á samræmdu námsmati hefur verið í undirbúningi, þar sem markmiðið er að tryggja betur hagsmuni nemenda og þarfir þeirra fyrir skýrt námsmat.“

Unnið hefur verið að tillögum um framtíðarsýn fyrir samræmt námsmat og skilaði vinnuhópur skipaður af ráðherra skýrslu um málið í fyrra. Hópurinn lagði þar m.a. til að þróuð yrðu heildstæð matstæki fyrir skóla, í mörgum námsgreinum, sem koma skyldu í stað samræmdra könnunarprófa. Þar yrði áhersla á fjölbreytt og hnitmiðuð rafræn próf og verkefni, ásamt auknu valfrelsi skóla til að nýta sér þau.

„Námsmat er mikilvægt verkfæri til þess að efla starfið í menntakerfinu – til að hvetja nemendur og gefa þeim upplýsingar um hvar þeir standa, fyrir kennara til þess að mæla árangur af sínum aðferðum og áherslum og fyrir skólastjórnendur og menntayfirvöld til þess að fylgjast með þróun mála. Okkar er að tryggja að námsmat sé gagnlegt, um það ríki sátt og skilningur og að áherslur séu í samhengi við aðalnámskrá. Við viljum stuðla að skýrri og skjótri endurgjöf fyrir nemendur og kennara og tillögur hópsins styðja það markmið okkar,“ segir ráðherra.

Fyrirhuguð er reglugerðarbreyting sem heimilar fyrrgreindar breytingar á framkvæmd samræmdra könnunarprófa í 9. bekk þetta vorið. Hún tekur meðal annars mið af Barnasáttmála Sameinuðu þjóðanna þar sem kveðið er á um að það sem sé barni fyrir bestu skuli ávallt hafa forgang þegar ráðstafanir eru gerðar í málefnum barna, og af þeim fordæmalausu aðstæðum sem uppi hafa verið vegna heimsfaraldurs COVID-19 á skólaárinu.

Efnisorð

Heimsmarkmiðin

4. Menntun fyrir öll

Hafa samband

Ábending / fyrirspurn
Ruslvörn
Vinsamlegast svaraðu í tölustöfum