Hoppa yfir valmynd
17. mars 2021 Mennta- og menningarmálaráðuneytið

Rúmlega 350 milljónir kr. í menningartengda tekjufallsstyrki

Þegar hafa verið greiddar út 356,8 milljónir kr. í tekjufallsstyrki til rekstraraðila í menningargeiranum og skapandi menningargreinum. Greiðsla styrkjanna hófst í janúar og en markmið þeirra er að styðja við einyrkja og fyrirtæki sem orðið hafa fyrir meira en 40% tekjufalli vegna sóttvarnaráðstafana eða takmarkana vegna COVID-faraldursins á tímabilinu frá apríl til október 2020. Heildarfjárhæð tekjufallsstyrkja sem þegar hafa verið greiddir nemur um 9 milljörðum kr.

Lilja Alfreðsdóttir mennta- og menningarmálaráðherra:

„Við kynntum 10 aðgerðir til stuðnings menningarlífinu í október sl., sem unnar voru í góðri samvinnu við Bandalag íslenskra listamanna. Tekjufallsstyrkirnir voru þar á meðal en einnig fjölgun starfslauna listamanna og tímabundin hækkun þeirra. Ég hvet listamenn, og þá sérstaklega þá sem starfa sjálfstætt, til þess að kynna sér úrræðið og nýta sér það.“

Samkvæmt nýjustu tölum hafa alls 126 aðilar í menningargreinum þegið tekjufallsstyrki, en það eru í flestum tilfellum sjálfstætt starfandi einstaklingar eða fyrirtæki með færri en 5 starfsmenn.

Styrkfjárhæðin tekur mið af rekstrarkostnaði og tekjufalli í hverju tilfelli en rekstraraðilar geta átt rétt á styrk sem nemur allt að 500.000 kr. á mánuði fyrir hvert stöðugildi. Hámarksstyrkur er 2-2,5 milljónir króna á mánuði. Skatturinn er framkvæmdaraðili tekjufallsstyrkja og veitir nánari upplýsingar um forsendur og skilyrði styrkveitinga. Umsóknafrestur vegna tekjufallsstyrkja er til 1. maí 2021.
 

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira