Til umsagnar: Afhending lyfja og umboð fyrir þriðja aðila - reglugerðarbreyting
.jpg)
HariÁ liðnu ári tók gildi breytt fyrirkomulag við afhendingu lyfja í apótekum með reglugerð nr. 740/2020,
þar sem í fyrsta sinn var kveðið á um skyldu þess að vera með annað hvort skriflegt eða rafrænt umboð til að fá afhent lyf frá þriðja aðila. Í kjölfar breytingarinnar komu upp vandkvæði þar sem dæmi voru um að aðstandendur langveikra og fatlaðra einstaklinga sem ekki voru færir um að veita slíkt umboð áttu í erfiðleikum með að fá lyf þeirra afhent. Til að bregðast við þessu hófu embætti landlæknis, lyfjastofnun og heilbrigðisráðuneytið sameiginlega vinnu við að skýra ákvæði gildandi reglugerðar hvað þetta varðar og eru drög að þeim breytingum hér með birt í samráðsgátt.
Meginbreytingin felst í því að skilgreint er svokallað upplýsingaumboð ætlað þeim sem hvorki geta nálgast lyfin sín né veitt öðrum umboð til þess. Slíkt umboð skal veitt af sérfræðilæknum og embætti landlæknis sér til þess að umboðið birtist í lyfjaávísunargátt. Embættið skal jafnframt birta leiðbeiningar fyrir sérfræðilækna um skilyrði fyrir útgáfu upplýsingaumboða sem kveða nánar á um skilyrði þess að veita slík umboð, hvaða aðstandendur skuli fá slíka heimild og hver gildistíminn skuli vera. Þá er einnig kveðið á um að umboðshafi fái nauðsynlegan aðgang að upplýsingum um lyfjaávísanir viðkomandi sem geri honum kleift að ganga erinda hans.
Í reglugerðardrögunum er enn fremur settur skýrari rammi um aðgang að upplýsingum úr lyfjagagnagrunni og kveðið á um að skráning umboða skuli vera miðlæg í gagnagrunni embættis landlæknis. Jafnframt er 14. gr. reglugerðarinnar uppfærð í samræmi við ný lyfjalög nr. 100/2020.
Reglugerðardrögin í samráðsgátt