Ríkisstjórnin fundaði með sveitarstjórnarfólki á Suðurnesjum

Sumarfundur ríkisstjórnarinnar var haldinn á Suðurnesjum í gær. Auk hefðbundins ríkisstjórnarfundar og vinnufundar hitti ríkisstjórnin fulltrúa fjögurra sveitarfélaga á svæðinu.

Á fundinum þar sem voru fulltrúar frá Reykjanesbæ, Grindavík, Suðurnesjabæ og Sveitarfélaginu Vogum auk fulltrúa frá Sambandi sveitarfélaga á Suðurnesjum var m.a. rætt um atvinnumál á Suðurnesjum, stöðu heilbrigðismála, eldsumbrot og jarðhræringar á Reykjanesskaga, samgöngumál og uppbyggingu innviða. Þá heimsótti ríkisstjórnin Þekkingarsetur Suðurnesja í Suðurnesjabæ og fékk kynningu á starfseminni.

Þetta er í fjórða sinn sem ríkisstjórnin heldur sumarfund utan Reykjavíkur en fyrri fundir voru í Snæfellsbæ, í Mývatnssveit og á Hellu þar sem einnig var fundað með sveitarstjórnarfólki af svæðinu.