Hoppa yfir valmynd
17. janúar 2022 Matvælaráðuneytið

Ný reglugerð um velferð alifugla

 

Svandís Svavarsdóttir, sjávarútvegs- og landbúnaðarráðherra hefur undirritað reglugerð um velferð alifugla, en tilgangur hennar er að tryggja velferð og heilbrigði allra alifugla með góðri meðferð, umhirðu og aðbúnaði.

Ný reglugerð byggir á samstarfi vinnuhóps þar sem sæti áttu fulltrúar alifuglabænda, Dýraverndarsambands Íslands og Matvælastofnunar.

Með nýrri reglugerð eru meðal annars gerðar eftirfarandi kröfur:

  • Hámarksþéttleiki fugla á aðgengilegu gólfsvæði í eldishúsum skal ekki fara yfir 39 kg/m². Heimild MAST til undanþágu er felld brott.
  • Óheimilt er að snúa alifugla úr hálslið án undangenginni deyfingar, sem felst í að rota fuglinn með höggi og svipta hann þannig meðvitund.
  • Óheimilt er að bera sláturkjúklinga og aðra fugla í samræmilegri þyngd af tegundinni Gallus gallus á öðrum fæti.
  • Umráðamanni alifugla ber að tilkynna Matvælastofnun um fyrirhugaða starfsemi eigi síðar en 30 dögum áður en starfsemi hefst, í stað þriggja mánaða, eins og samkvæmt eldri reglugerð. Breytingin er í samræmi við reglugerðir um velferð annarra dýrategunda.
  • Umráðamanni alifugla sem nota á við gerð auglýsinga, kvikmynda, leiksýninga eða við aðrar aðstæður og/eða í umhverfi sem alifuglum er ekki eðlilegt, ber að tilkynna Matvælastofnun um fyrirhugaða notkun eigi síðar en 10 dögum áður en áætluð notkun fer fram. Breytingin er í samræmi við reglugerðir um velferð annarra dýrategunda.
  • Umráðamaður eða eigandi fugla skal tilkynna til Matvælastofnunar um fyrirhugaða aflífun á fuglahópum sem í eru 250 alifuglar eða fleiri.

Reglugerðin var sett í Samráðsgátt stjórnvalda þann 5. nóvember sl. Tvær umsagnir bárust. Ráðherra hefur einnig ákveðið að skipa starfshóp sem verður falið að koma með tillögur að aukinni velferð alifugla.

Efnisorð

Heimsmarkmiðin

17. Samvinna um markmiðin

Hafa samband

Ábending / fyrirspurn
Ruslvörn
Vinsamlegast svaraðu í tölustöfum