Hoppa yfir valmynd
6. apríl 2022 Forsætisráðuneytið

Margrét Hallgrímsdóttir skipuð skrifstofustjóri á skrifstofu innri þjónustu

Margrét Hallgrímsdóttir - mynd

Forsætisráðherra hefur ákveðið að skipa Margréti Hallgrímsdóttur í embætti skrifstofustjóra á skrifstofu innri þjónustu í forsætisráðuneytinu. Skipað er í embættið til fimm ára en umsækjendur voru alls 23. Tveir umsækjendur drógu umsókn sína til baka á meðan á ráðningarferlinu stóð.

Þriggja manna hæfnisnefnd mat fimm umsækjendur mjög vel hæfa til að gegna embættinu. Eftir heildarmat á gögnum málsins og viðtöl við þá umsækjendur sem metnir voru mjög vel hæfir ákvað ráðherra að skipa Margréti Hallgrímsdóttur. Margrét tekur við embættinu 1. maí nk. og mun ráðuneytisstjóri gegna skyldum skrifstofustjóra til þess tíma.

Margrét Hallgrímsdóttir er með fil.kand. gráðu í fornleifafræði og latínu frá Stokkhólmsháskóla, cand.mag. gráðu í sagnfræði frá Háskóla Íslands og meistaragráðu í opinberri stjórnsýslu frá sama skóla. Margrét hefur gegnt embætti þjóðminjavarðar frá árinu 2000 að frátöldu tímabilinu 2014-2015 þegar hún var settur skrifstofustjóri í forsætisráðuneytinu. Áður gegndi hún embætti borgarminjavarðar.

Skrifstofa innri þjónustu tók til starfa 1. apríl sl. þegar nýtt skipurit forsætisráðuneytisins tók gildi. Helstu verkefni skrifstofunnar eru rekstur og fjármál ráðuneytisins, fjárlagagerð, stoðþjónusta við aðrar skrifstofur, eigna- og gæðamál og umsjón málaskrár og skjalasafns. Þá leiðir skrifstofan umbætur og þróun í innri starfsemi ráðuneytisins.

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira