Hoppa yfir valmynd
13. júní 2022 Forsætisráðuneytið, Félags- og vinnumarkaðsráðuneytið, Heilbrigðisráðuneytið, Mennta- og barnamálaráðuneytið, Háskóla-٫ iðnaðar- og nýsköpunarráðuneytið

Skýrsla starfshóps um félags- og heilsufarslegar aðgerðir vegna áhrifa heimsfaraldurs á viðkvæma hópa

Starfshópur sem ríkisstjórnin fól að vinna tillögur um félags- og heilsufarslegar aðgerðir vegna áhrifa heimsfaraldurs kórónuveiru á viðkvæma hópa hefur skilað skýrslu til forsætisráðherra.

Í skýrslu starfshópsins eru settar fram tillögur að sértækum aðgerðum sem hafa að markmiði að draga úr neikvæðum langtímaáhrifum faraldursins á viðkvæma hópa í íslensku samfélagi. Tillögurnar ráðast af vísbendingum um að áhrif faraldursins geti orðið langvinn ef ekki er brugðist við til skamms tíma.

Ríkisstjórnin samþykkti á fundi sínum sl. föstudag að veita 1 milljarð króna til aðgerða á árinu 2023 sem byggja á tillögum starfshópsins. Í apríl sl. ákvað ríkisstjórnin að veita allt að 750 milljónir króna til sértækra aðgerða á yfirstandandi ári. Í tengslum við gerð fjármálaáætlunar leitaði starfshópurinn eftir sjónarmiðum ráðuneyta um þörf fyrir framhald aðgerða á árinu 2023 til að mæta langtímaáhrifum faraldursins.   

Aðgerðirnar hafa að markmiði að auka virkni viðkvæmra hópa í samfélaginu, koma í veg fyrir og rjúfa einmannaleika og félagslega einangrun eldra fólks og fatlaðra, auka þjónustu við langtímaatvinnulausa, styðja við geðheilbrigðisþjónustu og fjarheilbrigðisþjónustu og beita auknum forvörnum og þjónustu við þolendur og gerendur ofbeldis. Þá gerir starfshópurinn tillögur um áframhaldandi aðgerðir til að bregðast við lengri biðtíma í úrræði á vegum stjórnvalda fyrir börn m.a. hjá Ráðgjafar- og greiningarstöð og Barna- og fjölskyldustofu og aðgerðir innan framhaldsskóla í tengslum við aukið brotthvarf frá námi, sálfræðiþjónustu og náms- og starfsráðgjöf. 

Starfshópnum var komið á fót í febrúar að beiðni ríkisstjórnarinnar með það að markmiði að tryggja samhæfingu um gerð tillagna um félags- og heilsufarslegar aðgerðir vegna áhrifa heimsfaraldurs kórónuveiru á viðkvæma hópa. Í starfshópnum, sem stýrt var af fulltrúa forsætisráðuneytis, störfuðu fulltrúar félags- og vinnumarkaðsráðuneytis, háskóla-, iðnaðar- og nýsköpunarráðuneytis, heilbrigðisráðuneytis, og mennta- og barnamálaráðuneytis.

Í skýrslunni er birt samantekt um nýlegar rannsóknir á áhrifum COVID-19 á félags- og heilsufarslega þætti hérlendis og í nágrannaríkjunum og er henni ætlað að vera heimild um hvaða lærdóm stjórnvöld geta dregið af áhrifum faraldursins á viðkvæma hópa með tilliti til opinberrar stefnumótunar og áætlanagerðar þannig að auka megi viðnámsþrótt stefnumótunar gagnvart utanaðkomandi vá og farsóttum í framtíðinni.

Áhrif heimsfaraldurs á COVID-19 á viðkvæma hópa - tillögur starfshóps um félags- og heilsufarslegar aðgerðir

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum