Nýsköpun í opinberum sparnaði í brennidepli á nýsköpunardegi hins opinbera

Nýsköpunardagur hins opinbera verður haldinn þriðjudaginn 23. maí kl. 9-13 í Veröld - húsi Vigdísar. Viðburðurinn er árlegur og að þessu sinni er yfirskrift dagsins Nýsköpun í opinberum sparnaði.

Markmið Nýsköpunardagsins er að stuðla að auknum opinberum innkaupum á nýsköpun með sérstakri áherslu á lausnir sem skapa sparnað í opinberum rekstri. Sprota- og nýskapandi fyrirtæki verða í aðalhlutverki með kynningum á nýjum og spennandi sparnaðarlausnum ásamt mikilvægum fróðleik um opinber innkaup á nýsköpun. Í kjölfar kynninga gefst færi á tengslamyndun milli fyrirtækja og opinberra aðila til að ræða leiðir að bættri þjónustu og aukinni skilvirkni í opinberum rekstri.

Skráningar er krafist vegna takmarkaðs sætafjölda. 

• Skráning í sal

• Viðburðurinn verður einnig aðgengilegur í streymi

Dagskrá:

• Opnunarávarp: Áslaug Arna Sigurbjörnsdóttir, háskóla- iðnaðar- og nýsköpunarráðherra

• Sparnaðarlausnir: 20 sprota- og nýsköpunarfyrirtæki, 5 mínútna kynningar

• Tengslamyndun og veitingar

Nánari upplýsingar um dagskrá má nálgast á island.is.

Léttar veitingar og kaffi verða í boði fyrir þau sem mæta snemma. Kaffihlé verður einnig kl. 10:15.

Að nýsköpunardegi hins opinbera standa Ríkiskaup, Fjársýslan, Samband íslenskra sveitarfélaga, háskóla-, iðnaðar- og nýsköpunarráðuneytið, fjármála- og efnahagsráðuneytið og Fjártækniklasinn.